بیجنگ(آئی این پی)چین نے امریکہ اور روس پر زور دیا ہے کہ وہ اختلافات کو دوستانہ مذاکرات کے ذریعے حل کریں۔ چائنہ ریڈیو انٹرنیشنل کے مطابق بیجنگ میں میڈیا بریفنگ کے دوران چین کی وزارت خارجہ کی ترجمان ہوا چھون اینگ نے کہا کہ چین روس اور امریکہ کے درمیان تعلقات کی بہتری کے لیے مثبت پیش رفت کی توقع کرتا ہے کیونکہ دونوں ملکوں کی عالمی سطح پر قیام امن اور ترقی کے حوالے سے اہم زمہ داریاں ہیں۔ ترجمان نے کہا کہ چین ،امریکہ اور روس کے درمیان باہمی تعاون کا فروغ تینوں ملکوں اور عوام کے مفاد میں ہے۔انہوں نے کہا کہ عالمی سطح پر درپیش چیلنجز سے نمٹنے کے لیے چین امریکہ اور روس کے ساتھ وسیع تعاون کے فروغ کا خواہاں ہے۔ روس کے صدر کی جانب سے سالانہ اختتامی پریس کانفرنس کے دوران چین روس باہمی تعلقات کو سراہنے کے حوالے سے ترجمان نے کہا کہ چین عالمی سطح پر امن ،استحکام اور سلامتی کے فروغ کے لیے روس کے ساتھ جامع تزویراتی شراکت داری کو مزید تقویت دینا چاہتا ہے۔