لندن(آئی این پی) برطانوی شہری کیون کرہین جیل میں مردہ حالت میں پایا گیا جسے عدالت نے مسجد پر حملہ کرنے کا جرم ثابت ہونے پر ایک سال قید کی سزا سنائی تھی۔

غیرملکی میڈیا کے مطابق برطانیہ کے شہر برسٹول کی مسجد پر حملے کے جرم میں ایک سال قید کی سزا پانے والا 35 سالہ برطانوی شدت پسند کیون کرہین بیرک میں مردہ حالت میں پایا گیا۔ کیون اس گروپ میں شامل تھا جس نے 17 جنوری کو برسٹول کے علاقے ٹوٹرڈان میں جامعہ مسجد پرحملہ کیا تھا جس کے بعد عدالت نے 20 جولائی کو اپنے فیصلے میں کیون کو ایک سال قید اور جرم میں شریک 48 سالہ مارک پینیٹ کو 9 ماہ، 46 سالہ ایلی سن پینیٹ کو 6 ماہ اور 31 سالہ انجلینا مارگریٹ کو 4 ماہ قید کی سزا سنائی تھی۔

دوسری جانب جیل ترجمان نے مسجد پر حملہ کرنے والے مرکزی ملزم کیون کرہین کی بیرک میں موت کی تصدیق کرتے ہوئے کہا ہے کہ کیون کی موت سے متعلق کچھ بھی کہنا قبل از وقت ہے تاہم واقعے کی وجوہات جاننے کے لیے تحقیقات کی جاری ہیں۔واضح رہے کہ گزشتہ چند سالوں سے برطانیہ میں مسلمانوں کے خلاف بعض نسل پرست گروپ سرگرم ہیں اور مساجد پر حملوں کے متعدد واقعات بھی رپورٹ ہوئے ہیں۔