اسلام آباد (مانیٹرنگ ڈیسک )پاکستان کرکٹ بورڈ کی ایگزیکٹو کمیٹی کے چیئرمین نجم سیٹھی نے پاکستان سپر لیگ کا فائنل لاہور میں نہ کرانے کی اطلاعات کو مستردکر دیا۔ انہوں نے بتایا کہ پی ایس ایل کا فائنل ملک میں نہ کرانے سے متعلق کوئی بات نہیں کی گئی، ان سے کئی لوگوں نے اس معاملے پر استفسار کیا تاہم فی الوقت کوئی ایسی تجویز زیر غور نہیں۔
نجم سیٹھی نے بتایا کہ سیکیورٹی اداروں سے معاملات حتمی مرحلے میں ہیں جبکہ وفاقی وزیر داخلہ چوہدری نثار علی خان سے بھی اس حوالے سے بات چیت کی گئی ہے جنہوں نے حفاظتی انتظامات میں رینجرز کو بھی شامل کرنے کی تجویز پیش کی ہے۔ابھی تک تو بھرپور کوشش ہے کہ کسی طرح پی ایس ایل کا فائنل لاہور میں ہو جائے اورخوش قسمتی سے ملک کے حالات اچھے رہے تو اس منصوبے پر عمل درآمد کرنے میں کامیاب ہو جائیں گے۔ نجم سیٹھی نے مزید کہا کہ پی ایس ایل کو نجی کمپنی بنانے کے حوالے سے بھی کافی متضاد باتیں ہو رہی ہے جبکہ کیس بھی غلط فہمی کا نتیجہ تھا۔
پی ایس ایل کو ماہرین کے کہنے پر الگ کمپنی بنایاگیا ہے اور اس میں بورڈ کا کوئی نقصان نہیں کیونکہ معاملات پی سی بی کے پاس ہی رہیں گے۔ ٹورنامنٹ کیلئے فرنچائزز کے ساتھ دس سالہ معاہدہ کیا گیا ہے۔ انہوں نے کہا کہ منفی خبریں اور افواہوں سے اس پراجیکٹ کو نقصان پہنچ سکتا ہے جو پاکستان کرکٹ کیلئے بھی تباہ کن ثابت ہو گا۔ پی ایس ایل کیلئے نجی کمپنی قائم کرنے میں چیئرمین شہریار خان یا ان کا ذاتی فائدہ نہیں کیونکہ ان کی مدت تو آئندہ برس اگست میں ختم ہو رہی ہے