دبئی(این این آئی)متحدہ عرب امارات کے نائب صدر اور حاکم دبئی الشیخ محمد بن راشد آل مکتوم نے دبئی ریاست کے لیے 2017ء کے مالی سال کا بجٹ منظور کرلیا۔ اجمالی طور پر آئندہ سال کے لیے دبئی کا بجٹ 47 ارب 30 کروڑ درہم یعنی 12.8 ارب ڈالر رکھا گیا ہے۔
عرب ٹی وی کے مطابق اماری دبئی کے لیے منظور کردہ بجٹ میں بنیادی ڈھانچے کی بہتری اور ترقیاتی منصوبوں کے لیے 27 فی صد اضافی بجٹ رکھا گیا ہے۔ مقررہ اہداف سرپلس کے لیے 2 ارب اور 900 ملین درہم کا بجٹ رکھا گیا ہے جس کے نتیجے میں دبئی میں روزگار کے 3 ہزار پانچ سو نئے مواقع پیدا ہوں گے۔
دبئی کی مالیاتی کمیٹی کے ڈائریکٹر جنرل عبدالرحمان آل صالح نے ایک بیان میں بتایا کہ مالی سال 2016ء کے مالیاتی نظام میں دبئی کی حکومت کے زیرانتظام کمپنیوں کی نئی درجہ بندی کی گئی تھی۔ کئی نئی کمپنیوں کو اس بجٹ میں شامل کیا گیا تھا جس کے نتیجے میں بجٹ کی آمدن اور اس کے اخراجات میں کمی آئی تھی۔آل صالح کا کہنا تھا کہ سنہ 2017ء کے مالیاتی بجٹ میں 3 فی صد اضافہ کیا گیا ہے۔
