یمن ( مانیٹرنگ ڈیسک ) یمن کی سمندری حدود میں کارگو شپ پر راکٹ حملہ کیا گیا جس کے نتیجے میں 7پاکستانی جاں بحق ہو گئے۔نجی ٹی وی چینل جیو نیوز کے مطابق ایرانی جہاز مصر سے دبئی جا رہا تھا کہ یمنی حدود میں نامعلوم افراد اور نامعلوم سمت سے راکٹ حملہ کیا گیا جس کے بعد جہاز میں آگ لگی اور یہ سمندر میں ڈوب گیا۔ جہاز پر 8پاکستانی سوار تھے جن میں 7افراد جاں بحق ہو گئے جبکہ شپ آفیسر کبیر نے کود کر اپنی جان بچائی۔
ساتوں پاکستانیوں کی لاشیں یمن میں ہی موجود ہیں جنہیں پاکستان لانے کیلئے انصار برنی ٹرسٹ نے کوششیں تیز کر دی ہیں۔ ذرائع کا کہنا ہے کہ حملے میں بچ جانے والے شپ آفیسر کبیر نے ہی پاکستان میں شپنگ کمپنی کے ایجنٹ کو واقعے کی اطلاع دی۔ جہاز کے کپتان انیس الرحما ن سمیت تمام عملہ پاکستانی تھا۔ کپٹن انیس کی اہلیہ کا کہناہے کہ پاکستان میں شپنگ کمپنی کے ایجنٹ سے رابطے میں ہیں۔