میلبور ن (این این آئی) پاکستان کرکٹ ٹیم کی میلبورن کرکٹ گراؤنڈ میں ٹریننگ کی، فاسٹ پچ کے لیے بلے بازوں کا خصوصی سیشن ہوا، طبیعت کی خرابی کے باعث سہیل خان نے ٹریننگ میں حصہ نہیں لیا ٗبیٹنگ کوچ گرانٹ فلاور نے بتایا کہ محمد عامر کے گھٹنے پر چوٹ آئی ہے مگر ٹیسٹ سے پہلے وہ فٹ ہوجائیں گے۔ تفصیلات کے مطابق پاکستان اور آسٹریلیا کے درمیان دوسرا ٹیسٹ 26 دسمبر سے میلبورن میں شروع ہوگا،کرکٹ ٹیم نے میلبورن کرکٹ گراؤنڈ میں بھرپورٹریننگ کی۔ فاسٹ بولر سہیل خان کی طبیعت ناشتہ کرنے کے بعد خراب ہوئی اور گراؤنڈ میں آتے ہی قے آگئی۔بیٹنگ کوچ گرانٹ فلاور نے میلبورن میں بات کرتے ہوئے کہاکہ بولرز کو اس وکٹ پر محنت کرنا پڑے گی۔انہوں نے بتایا کہ محمد عامر کو گرنے سے گھٹنے پر چوٹ آئی اور بیٹنگ کے دوران اسٹارک کی گیند لگی اور گھٹنے پر زخم آیا۔ محمد عامر ٹیسٹ سے پہلے بہتر ہو جائے گا۔گرانٹ فلاور نے کہا کہ مصباح کلاس پلیئر ہے، وہ پریشان نہیں اور جلد اچھی اننگز کھیلے گا۔بیٹنگ کوچ کے مطابق اسد شفیق مضبوط اعصاب کا کھلاڑی ہے جبکہ یونس خان پر تنقید درست نہیں وہ پہلے بھی سوئپ پر رنز کرتا رہا ہے۔