کراچی(این این آئی)جناح انٹرنیشنل ایئرپورٹ کراچی سے جدہ جانے والی قومی ایئر لائن کی پرواز سے کروڑوں روپے مالیت کی 15 کلو ہیروئن برآمد کر لی گئی ہے جبکہ پی آئی اے کے تین ملازمین کو گرفتارکرلیا گیا ہے۔ترجمان پی آئی اے کے مطابق پی آئی اے کی ویجیلنس ٹیم نے اینٹی نارکوٹکس اور کسٹم اہلکاروں کے ساتھ پی آئی اے کی جدہ جانے والی پرواز پی کے 712 کی چیکنگ کی تو جہاز کے خفیہ خانوں سے کروڑوں روپے مالیت کی 15 کلو ہیروئن برآمد ہوئی۔ پی آئی اے کی پرواز کو رات 2 بجے عمرہ زائرین کو لے کر جدہ کے لئے روانہ ہونا تھا لیکن جہاز سے اتنی بڑی تعداد میں ہیروئن برآمد ہونے کے بعد تمام مسافروں کو مقامی ہوٹل میں رہائش فراہم کر دی گئی اور جہاز کی مکمل تلاشی کا عمل شروع کر دیا گیا ہے۔طیارے تک 15کلوہیروئن کیسے پہنچی ؟، خفیہ خانوں میں کس نے چھپائی ؟، پرواز کا عملہ ملوث ہے یا کام کرنے والے دوسرے محکمہ کے افراد شامل ہیں؟ تحقیقات کی جارہی ہیں۔کسٹم حکام نے پی آئی اے کے تین ملازمین کو حراست میں لے لیا ہے۔پی آئی اے کے چیف ایگزیکٹوبرینڈ ہلڈن نے معاملے کی فوری تحقیقات کاحکم دیدیا ہے۔سی ای او پی آئی اینے ہدایت دی ہے کہ طیارے سے ہیروئن کی موجودگی کے حوالے تمام ذمہ داروں کے خلاف فوری کارروائی کی جائے۔