لاہور( آئی این پی) میو ہسپتال میں مریضہ کے لواحقین اور سکیورٹی گارڈز کے درمیان جھگڑا ‘ سکیورٹی گارڈ شاہد بٹ اور رضا کار نوید رفیع زخمی‘ہنگامہ آرائی اور لڑائی جھگڑے سے ایمر جنسی میدان جنگ بنی رہی ‘ پولیس نے مریضہ کے لواحقین کو گرفتار کر کے تفتیش شروع کر دی۔تفصیلات کے مطابق میو ہسپتال میں مریضہ کے لواحقین اور سکیورٹی گارڈز کے درمیان تصادم ہوا ہے جس میں سکیورٹی گارڈ شاہد بٹ اور ایک رضا کار نوید رفیع شدید زخمی ہو گئے ہیں۔
ہسپتال ذرائع کے مطابق بادامی باغ کی رہائشی خاتون کو ہسپتال لایا گیا تھا لیکن مریضہ کے ساتھ ورثا کے تعداد زیادہ ہو نے کی وجہ سے علاج معالجہ میں مشکلات پیش آرہی تھیں جس کی وجہ سے سکیورٹی گارڈز نے ورثا کو وارڈ سے باہر نکل جانے کو کہا جس پر ورثا اور سکیورٹی گارڈز کے درمیان تلخ کلامی ہوگئی جو بعد میں تصادم کی شکل اختیار کر گئی اطلاع ملنے پر پولیس نے موقع پر پہنچ کر مریضہ کے لواحقین کو گرفتار کر لیا اور اس دوران رضا کار نوید رفیع ملزمان کو مقامی چوکی تک منتقل کرنے میں پولیس کی مدد کررہا تھا کہ ملزمان نے پولیس پر اینٹوں سے حملہ کر دیا۔
جس سے نوید رفیع کے سر اور منہ پر شدید نوعیت کی چو ٹیں آئیں جو اس وقت میو ہسپتال میں زیر علاج ہے جبکہ پولیس نے لواحقین کو گرفتار کر کے تھانہ گوالمنڈی منتقل کر دیا ۔