اسلام آباد (این این آئی)پاکستان کرکٹ بورڈ (پی سی بی) کے چیئرمین شہریار خان نے سرفرازاحمد کو ایک روزہ ٹیم کی قیادت کیلئے مضبوط امیدوار قرار دیتے ہوئے کہا ہے کہ بورڈ کو اظہرعلی پر اعتماد نہیں رہا ٗکپتان کی تبدیلی کے حوالے سے ہیڈ کوچ مکی آرتھر کی رائے بھی لی گئی تھی ۔ ایک انٹرویو میں شہر یار خان نے کہاکہ ہم اظہر سے ایک کھلاڑی کی حیثیت سے خوش ہیں تاہم ان کی قائدانہ صلاحیتوں نے ہمیں اعتماد نہیں دیا اور ایک روزہ ٹیم میں ان کی جگہ غیر یقینی ہے انہوں نے کہاکہ یہ بھی حقیقت ہے کہ ہم نے انگلینڈ کے خلاف سیریز کے دوران کپتانی سے الگ ہونے کے فیصلے کو ان پر ہی چھوڑا تھا تاہم بعد ازاں مجموعی طورپرہمارا یہ فیصلہ ہوا تھا کہ انھیں ویسٹ انڈیز سے سیریز تک کپتانی جاری رکھنے کی اجازت دی جائے۔

شہریار خان نے کہا کہ ایک کپتان جب 3۔0 سے جیتتا ہے تو اس کے بعد ایک فیصلہ کرنا واقعی مشکل ہوتا ہے تاہم اب بھی میرا موقف ہے کہ یہ خالصتاً اظہر کا فیصلہ ہوگا کہ وہ جاری رکھیں لیکن پہلے انھوں نے کپتانی چھوڑنے سے انکار کیا تھا۔انہوں نے کہاکہ کپتان کی تبدیلی کے حوالے سے ہیڈ کوچ مکی آرتھر کی رائے بھی لی گئی تھی انھوں نے بھی سرفراز کو ذمہ داری دینے کے حق میں بات کی۔

چیئرمین پی سی بی نے کہا کہ سرفراز مضبوط امیدوار ہیں کیونکہ ہم تینوں فارمیٹ میں انھیں کپتان بنانے پر غور کرسکتے ہیں۔انہوں نے کہاکہ ہمارے کلچر میں ہمیشہ یہی اچھا ہے کہ تینوں فارمیٹ میں ایک کپتان ہو ٗپاکستان میں اور تاریخی طور پر یہ ہمارے لیے کارآمد ہے، ہم نہیں چاہتے کہ کسی کو فیصلہ کرنے کیلئے مجبور کیا جائے اور ہم چاہیں گے کہ ایک سینئر کھلاڑی عزت اور احترام کے ساتھ جائے۔پی سی بی کو مصباح کے متبادل پر بھی غور کرنا ہے کیونکہ انھوں نے ابھی یہ فیصلہ کرنا ہے کہ وہ کب تک پاکستان کے کھیلتے رہیں گے، آسٹریلیا کے خلاف سیریز ان کی آخری سیریز بھی ہوسکتی ہے