گوجرانوالہ (این این آئی) تھانہ پیپلز کالونی میں شوہر نے بغیر اجازت میکے جانے پر بیوی کو آگ لگا دی ۔میڈیا رپورٹ کے مطابق گوجرانوالہ کے نواحی علاقے پپلی والا میں ایک شخص نے سفاکی کی انتہا کر دی ، بغیر اجازت میکے جانے پر بیوی پر تیل چھڑکا اور آگ لگا دی ٗخاتون کو تشویشناک حالت میں قریبی ہسپتال منتقل کر دیا گیا
ذرائع نے بتایا کہ دونوں میاں بیوی میں اکثر اوقات مختلف معاملات پر جھگڑا رہتا تھا تاہم ان میں صلح کرا دی جاتی تھی تاہم ملزم نے خاتون پر تیل چھڑک کا آگ لگا دی اور فرار ہو گیا ۔ اہل علاقہ نے پولیس کو واقعے کے اطلاع دی جس کے بعد خاتون کو زخمی حالت میں ہسپتال لایا گیا ۔دریں اثناء میانوالی کے نواحی علاقے واں بھچراں میں غیر ت کے نام پر باپ نے بیٹی اور اس کے آشنا کو قتل کرد یا ۔
میڈیا رپورٹ کے مطابق واں بھچراں میں مظفر خان نے پسند کی شادی کیلئے گھر سے چلی جانے والی اپنی بیٹی م خ اور اسکے آشنا محمد احسان کو فائرنگ کر کے قتل کر دیا فائرنگ کے بعد ملزم فرار ہو گیا جس کی گرفتاری کیلئے پولیس نے ٹیم تشکیل دیدی ہے ۔پولیس کے مطابق ابتدائی تفتیش کے مطابق لڑکی اپنے ہمسائے محمد احسان کیساتھ پسند کی شادی گھر سے چلی گئی تھی جو گزشتہ رات گھر آئے تو لڑکی کے والد نے موقع پا کر دونوں پرفائرنگ کر دی جس کے نتیجے میں دونوں موقع پر جاں بحق ہوگئے واقعہ کے بعد دونوں کی لاشیں قبضے میں لیکر پوسٹ مارٹم کیلئے ہسپتال منتقل کر دی گئی ہیں اور ملزم کی تلاش شروع کر دی گئی ۔
