لاہور(نیوزڈیسک) چیف آف آرمی سٹاف کے اہم ترین عہدے سے ریٹائر ہونے والے پاکستان کے مقبول ترین آرمی چیف راحیل شریف کو جماعت اسلامی نے اپنی جماعت میں شامل ہونے کی پیشکش کی ہے ،اس پیشکش کا انکشاف جماعت اسلامی کے پارلیمانی لیڈر ڈاکٹر وسیم اختر نے گزشتہ روز کیا تھا انہوں نے جنرل راحیل شریف کی خدمات کو خراج تحسین پیش کیا اور کہا کہ جنرل راحیل شریف کو سیاسی نظام کو تبدیل کرنے کے لئے جماعت اسلامی کی مدد کرنی چاہئے ،وسیم اختر نے تو پیشکش کرہی دی لیکن ان کی اس پیشکش پر پارٹی کے دیگر رہنماؤں کی جانب سے اس کی شدید مخالفت کا سلسلہ شروع ہوگیا ہے
جماعت کے صوبائی وزیر ندیم کامران نے اس پیشکش کی شدید مخالفت کرتے ہوئے اسے پارٹی پالیسی کے سراسر متضاد قراردیتے ہوئے کہا کہ اگر راحیل شریف نے ہاں کردی تو جماعت اسلامی کے پاس ان کو دینے کیلئے کون سا عہدہ ہے؟جنرل راحیل شریف پہلے ہی اپنے عزائم کا واضح اظہار کرچکے ہیں کہ وہ ریٹائرمنٹ کے بعد شہداء کے ورثاء کے لئے کام کریں گے اور اسی سلسلے میں انہوں نے گزشتہ روز شہداء کیلئے قابل تحسین اعلانات بھی کئے ، ذرائع کا کہنا ہے کہ راحیل شریف کا کسی بھی طور پر سیاست میں آنے کا کوئی ارادہ نہیں اور فی الحال دو سال تک وہ اس قسم کی سرگرمیوں میں حصہ نہ لینے کے بھی پابند ہیں۔
