راولپنڈی /کوٹلی(آئی این پی )بھارتی جنگی جنون میں ہر آنے والے دن کے ساتھ اضافہ ہوتا جا رہا ہے ، بھارتی فوج نے ایل او سی کے 3سیکٹرز پر بلااشتعال فائرنگ کرکے 4شہریوں کو شہید اور10کو زخمی کردیا، پاک فوج نے بھرپور جوابی کارروائی کرتے ہوئے 6بھارتی فوجیوں کو واصل جہنم کردیا۔ بھارت کا جنگی جنون ختم ہونے کو نہیں آرہا، مقبوضہ کشمیر میں

اس کے مظالم دنیا کے سامنے آنے کی خفت مٹانے کیلئے بھارت نے ایل او سی اور ورکنگ باؤنڈر ی پر پاکستانی شہریوں کو ہدف بنا نا شروع کردیاہے ، کھوئی رٹہ کے بعد جند روٹ، کیرالہ اور بڑوہہ سیکٹرزپر بھارتی فوج نے ایل او سی پر بلا اشتعال گولہ باری کردی جس کے نتیجے میں خاتون سمیت 4 افراد شہید اور 10 زخمی ہوگئے جب کہ پاک فوج کے بھرپور جواب میں 6 بھارتی فوجی ہلاک ہوگئے۔

ترجمان پاک فوج کے مطابق بھارتی فوج نے جند روٹ، کیرالہ اور بڑوہہ سیکٹرز میں فائرنگ کی گئی جس کے نتیجے میں 4 شہری شہید ہوئے جن کی شناخت الطاف، نازیہ کوثر، عتیق اور تصور کے ناموں سے ہوئی۔ پاک فوج کے شعبہ تعلقات عامہ (آئی ایس پی آر) کے مطابق بھارتی اشتعال انگیزی سے 10 افراد بھی زخمی ہوئے جب کہ پاک فوج کی جانب سے بھارتی اشتعال انگیزی کا منہ توڑ جواب دیا گیا جس سے بھارت کو بھاری جانی نقصان اٹھانا پڑا اور اس کے 6 فوجی ہلاک ہوگئے۔