سرگودہا ( آن لائن )لوگوں کی بڑی تعداد حکومت کی جانب سے جاری کئے جانیوالے دس روپے کے سکے کے حصول کیلئے کرنسی ڈیلروں کے پاس پہنچ گئی کرنسی ڈیلر 10 روپے کا سکہ 15 روپے میں فروخت کرتے رہے تاہم لوگوں کی اکثریت نے 5 اور 10 روپے کے سکے کو ناقابل قبول قرار دیتے ہوئے کہا ہے کہ حکومت 5 اور 10 روپے کے نوٹ جاری کرے تاکہ پاکستانی کرنسی کا تشخص لوگوں کی نظر میں ابھر کر سامنے آئے اقتصادی راہداری منصوبے سے بیرونی سرمایہ کار پاکستان آئینگے اس لئے پاکستانی کرنسی کو مضبوط اور مستحکم رکھنے کیلئے کرنسی نوٹوں کا اجراء کی جائے۔
واضح رہے کہ اسٹیٹ بینک نے پیر 24 اکتوبر کو 10 روپے مالیت کا نیا سکہ جاری کرنے کا اعلان کیا تھا۔ جس کی منظوری وفاقی حکومت پہلے ہی 17 جولائی کو دے چکی تھی۔ یہ نیا سکہ زرد رنگ کا ہوگا جبکہ اس کا وزن 5.50 گرام اور قطر 25.5ملی میٹر ہے۔ سکے کے ایک جانب روایتی ہلال اور ستارہ موجود ہے جبکہ چاند اور تارے کے اوپر ’اسلامی جمہوریہ پاکستان‘ اردو میں درج ہے۔ چاند کے نیچے اور گندم کی دو ڈالیوں کے درمیان سکے کے جاری ہونے کا سال درج ہے۔ سکے کے دوسری رخ پر شاہ فیصل مسجد کی تصویر کو کندہ کیا گیا جس کے اوپر فاختائیں اڑتی دکھائی دے رہی ہیں۔ مسجد کے عکس کے نیچے واضح الفاظ میں 10 کا ہندسہ درج ہے جبکہ سکے کے نچلے جانب اردو میں ’10 روپیہ‘ لکھا گیا ہے۔

موضوعات:10روپے والا سکہ