اسلام آباد(مانیٹرنگ ڈیسک) پاکستان تحریک انصاف کے سربراہ عمران خان نے حالیہ پاک بھارت کشیدگی اور مودی کی پاگل ذہنیت کے خلاف میڈیا سے گفتگو کرتے ہوئے کہا تھا کہ نریندر مودی اس غلط فہمی میں نہ رہیں کہ پاکستانی ڈر جائیں گے۔ ہم ڈرنے والے نہیں اور نہ ہی پیچھے ہٹنے والے ہیں۔ مودی بارڈر پر اپنے ناپاک ارادوں سے دور رہیں۔ عمران خان کے بیان پر بھارتیوں کو گویا آگ لگ گئی اور بھارتی میڈیا نے ہمیشہ کی طرح غیر ذمہ دارانہ صحافت کرتے ہوئے عمران خان کیخلاف زہر اگلنا شروع کر دیا۔ بھارتی ٹی وی رپورٹ میں کہا گیا کہ پاکستانی سیاستدان بھارت کی طاقت دیکھ کر خائف ہو گئے ہیں اور وہ مودی کو للکارنے کی حماقت کر رہے ہیں۔ بھارتی ٹی وی رپورٹ میں ہرزہ سرائی کی گئی کہ پاکستانی ڈر کر پیچھے ہٹ گئے ہیں اور عمران خان جیسے سیاستدان حالیہ پاک بھارت کشیدگی پر سیاست چمکا رہے ہیں۔ بھارتی ٹی وی رپورٹ میں دعویٰ کیا گیا کہ بارڈر پر بھارتی فوج نے کرارا جواب دے کر پاکستان کا منہ بند کر دیا ہے اور پاکستان بھارت سے ہار گیا ہے۔

موضوعات:پاک بھارت کشیدگی