لاہور(این این آئی )پنجاب میں سپر لیگ ٹی 20 کپ کا انعقاد 24ستمبر سے یکم اکتوبر تک لاہور قلندرز کے زیر اہتمام قذافی سٹیڈیم لاہور میں ہوگاجس میں 18ضلع کی ٹیمیں حصہ لیں گی او رجیتنے والی 17رکنی ٹیم آسٹریلیا میں بین الاقوامی میچ کھیلے گی ۔ٹی 20کپ کے افتتاحی میچ میں وزیراعلی پنجاب محمدشہبازشریف مہمان خصوصی ہوں گے اور کھلاڑیوں سے حلف لیں گے۔ یہ بات صوبائی وزیر برائے کھیل آصف سعید منہیس نے قذافی سٹیڈیم میں لاہو رقلندر ز کے زیر اہتمام منعقد ہونیوالے کرکٹ میچوں کی تیاری اور انتظامات کے سلسلہ میں اعلی سطحی اجلاس کی صدارت کے دوران کہی۔ اس موقع پر سیکرٹری سپورٹس نیئر اقبال ، کمیشن لاہو رعبداللہ سنبل، ڈی سی او لاہور کیپٹن (ر) عثمان، عاطف نعیم رانا چیئرمین لاہور قلندر، ایس پی ماڈل ٹاؤن ، ریسکیو پنجاب ، پی ایچ اے ، ٹریفک ، ہیلتھ اورپنجاب سپورٹس بورڈ کے افسران موجودتھے۔اجلاس کے دوران وزیر کھیل نے کہاکہ سپر لیگ ٹی 20میچز شروع ہونے سے قبل میچ دیکھنے والے ناظرین کے لئے ہر ممکن سہولیات فراہم کی جائیں گی اور سکیورٹی کے فول پروف انتظامات کے ساتھ ساتھ ٹریفک کی روانی اورسٹیڈیم میں گاڑیوں کی پارکنگ اور لائٹنگ کا بھی بہترین انتظام کیا جائیگا تاکہ سٹیڈیم میں میچ دیکھنے والوں کو کسی قسم کی تکلیف یا دقت کا سامنانہ کرنا پڑے۔ انہوں نے کہاکہ سٹیڈیم میں داخلہ انٹری ٹکٹ کے ذریعے ہوگا اور 25ہزار سے زائد کرکٹ کے شائقین میچ دیکھ سکیں گے۔انہوں نے کہاکہ کھیلوں سے نوجوان نسل میں صحت مند سرگرمیاں جنم لیں گی اوروہ صحت منداور تواناہونے کے ساتھ ساتھ بین الاقوامی سطح پر اپنے ملک کا نام بھی روشن کریں گے۔انہوں نے کہاکہ پنجاب سپورٹس بورڈپسماندہ اور دیہی علاقوں کے نوجوانوں میں ٹیلنٹ تلاش کر کے اپنے پلیٹ فارم کی بدولت انہیں بین الاقوامی سطح پر متعارف کرواتا ہے۔