لاہور(مانیٹرنگ ڈیسک) پاکستان اور ویسٹ انڈیز کے درمیان ٹی 20، ون ڈے اور ٹیسٹ سیریز کا ”لوگو“ جاری کردیا گیا۔لاہور کے مقامی ہوٹل میں پاک ویسٹ انڈیز مکمل سیریز کے لوگو کی تقریب رونمائی ہوئی، جس میں اسپانسر اداروں کے نمائندوں اور پی سی بی حکام نے شرکت کی۔پی سی بی کے چیف آپریٹنگ آفیسر سبحان احمد نے تقریب سے خطاب کرتے ہوئے کہا کہ اسپانسرز کے تعاون کے بغیر پاکستان میں کرکٹ کی سرگرمیاں جاری رکھنا ممکن نہیں تھا، جنہوں نے ہر مشکل وقت میں بورڈ کا بھرپور ساتھ دیا، اُمید ہے یہ سلسلہ مستقبل میں بھی جاری رہے گا۔جاوید آفریدی نے کہا کہ گزشتہ کئی برس سے پاکستان کرکٹ کو وہی ادارے اسپانسر کر رہے ہیں، نئے اداروں کو بھی اس حوالے سے اپنا کردار ادا کرنا چاہئے۔زین کا کہنا ہے کہ ہم لوگ پاکستان سے کما کر اس کا امیج بہتر بنانے پر خرچ کررہے ہیں تاکہ دنیا کو بتایا جاسکے کہ ہم ایک امن اور ترقی پسند قوم ہیں، اسپانسر ادارے پاکستان میں انٹرنیشنل کرکٹ کی بحالی کیلئے اہم کردار ادا کررہے ہیں۔

موضوعات:سیریز کا لوگو