لاؤس(این این آئی)فلپائن کے صدر کی جانب سے امریکی صدر براک اوباما کے خلاف نازیبا کلمات ادا کرنے پر اوباما نے ان سے ہونے والی ملاقات منسوخ کردی ہے۔غیر ملکی میڈیا کے امریکی صدر لاؤس میں ایشیائی ممالک کی تنظیم آسیان میں شرکت کیلئے پہنچے ہیں جہاں ان کی فلپائن کے صدر سے ملاقات ہونا تھی تاہم براک اوباما نے فلپائنی صدر روڈریگو ڈیو ٹرٹی کی جانب سے انہیں ’’ بازاری عورت کا بیٹا‘‘ کہنے پر ملاقات منسوخ کردی۔اس سے قبل براک اوباما نے کہاکہ جب وہ صدر روڈریگو ڈیو ٹرٹی سے ملاقات کریں گے تو اس دوران فلپائن میں منشیات فروشوں کے ماورائے عدالت قتل کا معاملہ اٹھائیں گے جس پر فلپائنی صدر نے امریکی صدر کے خلاف نازیبا کلمات ادا کرتے ہوئے کہا کہ میں ایک خود مختار ریاست کا صدر ہوں اوربراک اوباما کون ہوتے ہیں جس کو میں جواب دوں۔واضح رہے کہ رواں سال جون میں فلپائن کے صدر روڈریگو ڈیو ٹرٹی نے اپنے عہدے کا حلف اٹھانے کے بعد ملک میں منشیات فروشوں کے خلاف بڑے پیمانے پر آپریشن شروع کررکھا ہے جس میں اب تک 2 ہزار سے زائد افراد مارے جا چکے ہیں اور اتنے بڑے پیمانے پر ہلاکتوں کے خلاف عالمی سطح پر تشویش کا اظہار کیا جارہا ہے۔