اسلام آباد (مانیٹرنگ ڈیسک ) پاکستانی نڑاد برطانوی باکسر عامر خان نے الزام عائد کیا ہے کہ حکومت پنجاب کی جانب سے لاہور میں فیفا فٹبال آفس کے قریب انھیں باکسنگ اکیڈمی کے قیام کے لیے دی گئی زمین ‘ متنازع ہے۔ صحافیوں سے گفتگو میں عامر خان نے کہا کہ باکسنگ اکیڈمی کے قیام کے لیے انھیں دی گئی زمین متنازع ہے۔انہوں نے کہا کہ وزیراعلیٰ پنجاب نے مجھ سے وعدہ کیا تھا کہ اس مقصد کے لیے مجھے زمین فراہم کریں گے لیکن عملی طور پر مجھے کوئی زمین نہیں دی گئی۔عامر خان کا کہنا تھا کہ پاکستان میں باکسنگ کا بے پناہ ٹیلنٹ موجود ہے اور انھیں یہاں کے نوجوانوں کو تربیت فراہم کرکے خوشی ہوگی۔
عامر خان کے ترجمان نے مقامی اخبار کو بتایاکہ اس حوالے سے باکسر عامر خان پنجاب کے سیکرٹری سپورٹس سے ملاقات کرکے اس معاملے بر تبادلہ خیال کرینگے۔ترجمان نے مزید بتایاکہ عامر خان اور دوسرے متعلقہ حکام نے صوبائی وزیر رانا مشہود سے ملاقات کی اور حوالے سے بات چیت کی گئی۔ترجمان نے مزید بتایا کہ اگر پنجاب حکومت کی جانب سے باکسنگ اکیڈمی کے حوالے سے کوئی بات چیت ہوئی تو اس حوالے سے میڈیا کو آگا ہ کیا جائے گا۔میڈیا رپورٹس کے مطابق پنجاب حکومت کے ترجمان نے دعوی کیا ہے کہ وزیراعلیٰ شہباز شریف نے عامر خان کو باکسنگ اکیڈمی کے قیام کے لیے زمین کا ٹکڑا دینے کا کوئی وعدہ نہیں کیا تھا دراصل پنجاب حکومت قذافی اسٹیڈیم کے قریب 10 کروڑ روپے کی لاگت سے ایک باکسنگ اکیڈمی بنا رہی ہے اور عامر خان سے درخواست کی گئی تھی کہ وہ اس اکیڈمی میں نوجوان ٹیلنٹ کو تربیت دیں، جہاں تعمیراتی کام کا آغاز رواں برس کیا جائے گا۔