ڈاکار (اے پی پی) چاڈ کے سابق صدر حسین حبر ی کو انسانیت کے خلاف جرائم کے الزام میں عمر قید کی سزا سنائی گئی۔ عالمی میڈیا کے مطابق سینیگال کے دارالحکومت ڈاکار میں افریقی یونین حمایت کی یافتہ عدالت نے یہ فیصلہ سناتے ہوئے چاڈ کے سابق صدر کو انسانیت کے خلاف جرائم کے الزام میں عمر قید کی سزا سنا دی ہے ۔سابق صدر پر جج نے الزام عائد کرتے ہوئے انہیں جنسی زیادتی، جنسی استحصال اور 40 ہزار لوگوں کے قتل کامجرم قرار دیا ۔ اس موقع پرمتاثرین کی وکیل جیکولین مادینا نے کہاکہ پورے افریقہ میں لوگوں کواس فیصلے سے بے حد خوشی ہے کیونکہ ہم نے پوری دنیا میں اور خاص طور پر چاڈ میں پیغام دیا کہ آمروں کا کیا انجام ہوتا ہے۔ ہلاک ہونے والوں کے خاندان والوں نے بھی فیصلے کو تاریخی قرار دیا ہے۔حبری نے پوری سماعت کے دوران عدالت کی قانونی حیثیت پر ہی سوال اٹھائے اور اپنے اوپر لگے تمام الزامات سے انکار کیا۔حبری 1982 سے 1990 تک چاڈ کے حکمران رہے اوراپنے دور اقتدار کے دوران انہیں امریکا کی حمایت حاصل تھی۔ انہیں فیصلے کے خلاف اپیل کرنے کے لیے 15 دن کا وقت دیا گیا ہے۔