فلوجہ (اے پی پی) امریکی فوج کا کہنا ہے کہ خود کو دولتِ اسلامیہ کہلانے والی شدت پسند تنظیم کا اہم کمانڈر فلوجہ میں اتحادیوں کی فضائی کارروائی میں ہلاک ہو گیا ہے۔امریکی کرنل سٹیون وارن کا کہنا ہے کہ اس کارروائی میں 70 دیگر شدت پسند بھی مارے گئے۔ان کا کہنا تھا کہ گذشتہ چار دنوں کے دوران 20 سے زائد فضائی کارروائیوں میں داعش کے ٹھکانوں کو نشانہ بنایا گیا۔کرنل وارن کے مطابق داعش کے کمانڈر ماہر البلاوی فضائی کارروائی کے دوران ہلاک ہو گئے۔کرنل وارن کے مطابق فلوجہ میں اس وقت 50,000 عام شہری پھنسے ہوئے ہیں اور انھیں فضا سے چھپے ہوئے صفحات گرا کر بتایا گیا ہے کہ وہ داعش کے علاقوں میں جانے سے گریز کریں اور اپنی چھتوں پر سفید کاغذ کی شیٹ لگائیں۔دوسری جانب اقوامِ متحدہ کا کہنا ہے کہ اسے ایسی اطلاعات موصول ہوئی ہیں کہ فلوجہ میں لوگ بھوک سے مر رہے ہیں اور انھیں داعش کی جانب سے لڑنے سے انکار کرنے پر ہلاک کیا جا رہا ہے۔اقوامِ متحدہ کی ہائی کمشنر برائے مہاجرین کی خاتون ترجمان ملیسا فلیمنگ کا کہنا ہے کہ ہمارے پاس ایسی اطلاعات ہیں کہ داعش مردوں اور بڑی عمر کے لڑکوں کو ان کی جانب سے نہ لڑنے کے انکار کے بعد انھیں ہلاک کر رہی ہے۔عراقی فوج، پولیس اور ملیشیا نے پیر کو بغداد کے مغرب میں 50 کلو میٹر دور فلوجہ شہر کو داعش سے واپس لینے کے لیے کارروائی شروع کی تھی۔اس شہر پر داعش کا قبضہ عراق اور شام میں کسی بھی شہر پر سب سے زیادہ طویل قبضہ ہے۔