ویانا(آئی این پی)آسٹریا کے شہر نینزنگ میں مسلح شخص نے میوزک کنسرٹ میں اندھا دھند فائرنگ کردی جس کے نتیجے میں 2 افراد ہلاک اور 11 زخمی ہوگئے بعد ازاں حملہ آور نے خود کو گولی مار کر ہلا ک کردیا۔غیر ملکی میڈیاکے مطابق آسڑیا میں پولیس حکام کا کہنا ہے کہ ایک مسلح شخص نے میوزک کنسرٹ میں اندھا دھند فائرنگ کی جس سے دو افراد ہلاک ہوئے ہیں اور خود حملہ آور نے بھی اپنے آپ کو گولی مار کر ہلاک کرلیا۔یہ واقعہ مقامی وقت کے مطابق صبح تین بجے پیش آیا جس میں مزید 11 افراد زخمی ہوئے ہیں۔ بعض زخمیوں کی حالات نازک بتائی جا رہی ہے۔اطلاعات کے مطابق 27 سالہ حملہ آور کی فائرنگ سے قبل ہی کار پارک کرنے کی جگہ پر اس کی ایک خاتون کے ساتھ بحث و تکرار ہوئی تھی۔خبروں کے مطابق حملہ آور بندوق نکالنے کے لیے پہلے اپنی کار کی طرف گیا اور پھر اسے نکالتے ہی وہاں پر جمع تقریبا 150 افراد کی بھیڑ پر اندھا دھند فائرنگ شروع کر دی۔پھر وہ شخص کار پارک کرنے کی جگہ واپس آیا اور اپنے آپ کو بھی گولی مار لی۔ سرکاری ٹی وی چینل او آر ایف کے مطابق بظاہر ایسا لگ رہا ہے کہ وہ بندوق اصل میں ایک رائفل تھی۔یہ میوزک کنسرٹ ایک موٹر سائیکل کلب نے منعقد کیا تھا۔شہر کی میئر فلوریناکیزرولر کا کہنا ہے کہ موسیقی کا یہ پروگرام گذشتہ دس برسوں سے یونہی بغیر کسی مسئلے کے آرام سے ہوتا رہا تھا جس میں پہلے کبھی کوئی خلل نہیں پڑا۔جب یہ واقعہ پیش آیا تو اس وقت وہاں پر لائٹیں بہت کم جل رہی تھیں اور روشنی مدھم تھی۔میئر کا کہنا تھا کہ کنسرٹ میں آنے والے لوگ فائرنگ سے ڈر کر ادھر ادھر بھاگنے لگے اور بہت سے لوگ جان بچانے کے لیے آس پاس کی جھاڑیوں میں جا چھپے۔‎