اسلام آباد (این این آئی) سپریم کورٹ نے پنجاب اسمبلی کے حلقہ پی پی 232وہاڑی میں دوبارہ انتخابات کرانے کاحکم دیتے ہوئے الیکشن ٹریبونل کافیصلہ برقراررکھا ٗ مسلم لیگ ن کے امیدوار محمد یوسف کسیلہ کی اپیل خارج کردی ہے۔ پیرکو چیف جسٹس انور ظہیر جمالی کی سربراہی میں جسٹس شیخ عظمت سعید اورجسٹس فیصل عرب پرمشتمل تین رکنی بینچ نے کی ، درخواست گزارکی طرف سے ایڈووکیٹ شہزاد شوکت نے پیش ہوکر موقف اپنایا کہ جن اثاثوں کی بنیاد پر ان کے موکل کو نااہل قراردیا گیا ہے وہ ان کی ملکیت نہیں بلکہ وہ اس میں شراکت دار تھے۔مخالف وکیل نے موقف اپنایاکہ کاغذات نامزدگی میں تفصیلات دینا لازمی اورذرائع آمدن کو چھپانا قانون کے مطابق نااہلیت کے زمرے میں آتا ہے۔ بعدازاں عدالت نے مختصر فیصلے سناتے ہوئے الیکشن ٹربیونل کا فیصلہ برقرار رکھا، اورواضح کیاکہ مقدمہ کاتفصیلی فیصلہ بعد میں جاری کیا جائیگا۔یادرہے الیکشن 2013 ء میں اسی حلقے سے محمد یوسف آزاد حثیت سے کامیاب ہوئے تھے جو بعد میں مسلم لیگ ن میں شامل ہوگئے ، تاہم مخالف امیدوار غلام محی الدین نے اثاثے چھپانے کا الزام لگاتے ہوئے ان کی کامیابی کوالیکشن ٹریبونل میں چیلنج کیا تھا،جس نے الزامات ثابت ہونے محمد یوسف کو نااہل قرار دیدیا تھا جس کیخلاف محمد یوسف نے سپریم کورٹ سے رجوع کیا تھا۔