کراچی(این این آئی)احتساب عدالت میں ڈاکٹر عاصم کرپشن کیس کی سماعت کے دوران اہم گواہ راحیل شاہنواز کا ڈاکٹر عاصم حسین کے خلاف بیان ریکارڈ کرلیا گیاہے۔تفصیلات کے مطابق احتساب عدالت میں ڈاکٹر عاصم کرپشن کیس کی سماعت کی گئی، دورانِ سماعت ضیا الدین اسپتال آڈٹ فرم آفیسر اور اہم گواہ راحیل نے عدالت میں جج کے روبرو پیش ہوکر اسپتال سے متعلق اہم بیان ریکارڈ کروادیا ہے۔راحیل شاہنواز نے عدالت کو بیان دیا کہ ضیا الدین اسپتال فلاحی ادارہ نہیں بلکہ تجارتی اسپتال ہے، اسپتال کو ملنے والا فنڈ فلاحی کاموں کے لئے خرچ نہیں کیا گیا۔گواہ نے عدالت کو مزید بتایا کہ اسپتال کو فلاحی کاموں کی مد میں ملنے والے پیسے تجارتی مقاصد کے لئے استعمال نہیں کیے گئے ہیں۔دوسری جانب ڈاکٹر عاصم حسین نے صحافیوں سے غیررسمی گفتگو کرتے ہوئے کہا ہے کہ گواہ نے جو بھی بولا وہ سچ ہے، نیب جتنا سچ کو دبائے گا اتنا ہی سچ سامنے آئے گا۔ڈاکٹر عاصم نے مزید کہا کہ عدالتوں پر مکمل اعتماد ہے اور امید ہے کہ انصاف پر مبنی فیصلے کیے جائینگے، کیس کی مزید سماعت اکیس مئی تک ملتوی کردی گئی ہے۔واضح رہے چھ مئی کو احتساب عدالت میں پراسیکیوٹر کی جانب سے ڈاکٹر عاصم حسین پر دررِ وازارت میں اختیارات کو استعمال کرتے ہوئے گیس اور پیٹرولیم کے ٹھیکے جاری کرنے کے حوالے چونسٹھ ارب روپے کی کرپشن کا الزام عائد کیا گیا تھا۔ فردِجرم میں مزید کہاگیا تھا کہ ڈاکٹرعاصم نے اپنے دورِ وزارت میں مصنوعی گیس کی قلت پیدا کی جس کے باعث کھاد دوسرے ملک سے درآمد کر کے مہنگے داموں فروخت کی گئی، جس سے ملکی خزانے کو چار سو باسٹھ ارب روپے کا خسارہ ہوا۔