ورجینیا (این این آئی) ویسٹ ورجینیا میں امریکی صدارتی نامزدگی کے لیے ہونے والے پرائمری انتخابات میں ڈیمو کریٹک امیدوار برنی سینڈرز نے ہیلری کلنٹن کو شکست دے دی ، ری پبلکن کے واحد ڈونلڈ ٹرمپ ویسٹ ورجینیا اور نیبراسکا سے کامیاب قرار پائے ۔میڈیارپورٹس کے مطابق امریکی ریاستوں ویسٹ ورجینیا اور نیبراسکا میں ڈیمو کریٹک پارٹی اور ری پبلکن پارٹی کے پرائمری انتخابات منعقد کیے گئے ۔ ویسٹ ورجینیا میں ڈیمو کریٹ امیدوار برنی سینڈرز نے ہیلری کلنٹن کو شکست سے دوچار کر دیا ۔برنی سینڈرز انتخاب جیتنے کے بعد صدارتی امیدوار بننے کے لیے پْر امید ہے ۔ تاہم مجموعی طور پر وہ ہلیری کلنٹن سے پیچھے ہیں ،آئندہ مہینے کیلیفورنیا کے پرائمری انتخابات جیتنے کی صورت میں وہ ہیلری کلنٹن کے لیے مشکلات کھڑی کر سکتے ہیں ۔دوسری جانب رپبلکن پارٹی کے واحد صدارتی امیدوار ڈونلڈ ٹرمپ ویسٹ ورجینیا اور نیبراسکا ریاست میں فاتح قرار پائے ہیں ۔ کوئی حریف مدمقابل نہ ہونے کے باعث ڈونلڈ ٹرمپ ری پبلکن پارٹی کے ممکنہ صدارتی امیدوار تصور کیے جاتے ہیں۔