لندن(نیوز ڈیسک)انتخاب کیا ہے،کبھی تصور نہیں کر سکتا تھا کہ مجھ جیسا کوئی لندن کا میئر منتخب ہو گا، خوف کی سیاست کو اس شہر میں خوش آمدید نہیں کیا جائے گا، تمام لندن والوں کا میئر ثابت ہونگا۔برطانوی میڈیا کے مطابق لیبر پارٹی کے پاکستانی نژادلندن کے نومنتخب میئر صادق خان نے لندن کے کیتھڈرل چرچ میں حلف اٹھایا ۔ تقریب سے خطاب کرتے ہوئے صادق خان نے کہا کہ مجھے لندن کا میئر بننے پر خوشی ہے،لندن کے شہریوں کے مسائل حل کرنے کے لئے بھرپور کردار اداکروں گا۔ان کا کہنا تھا کہ آج کی تقریب میں آپ کی شرکت میرے لئے باعث افتخار ہے،میراوعدہ ہے کہ اب لند ن کی ہر چیز بہتر ہوگی۔اس سے قبل انتخابات میں کامیابی کے بعد اپنے خطاب میں صادق خان کا کہنا تھا کہ وہ کبھی تصور نہیں کر سکتے کہ ان جیسا کوئی لندن کا میئر منتخب ہوگا۔ انھوں نے وعدہ کیا کہ وہ تمام لندن والوں کے میئر ثابت ہوں گے۔انھوں نے کہا کہ انتخابی مہم تنازعے سے عاری نہیں تھی تاہم ان کا کہنا تھا کہ میں فخر محسوس کرتا ہوں کہ لندن نے آج خوف کے بجائے امید کا انتخاب کیا ہے۔صادق خان نے کہا کہ خوف کی سیاست کو اس شہر میں خوش آمدید نہیں کیا جائے گا۔واضح رہے کہ لندن کے میئر کو ٹرانسپورٹ، پولیس، ماحولیات، ہاسنگ اور پلاننگ جیسے اہم شعبوں میں مکمل اختیار حاصل ہوتا ہے اور لندن اسمبلی کے ارکان میئر کی پالیسیوں پر نظر رکھتے ہیں۔لندن شہر کی اسمبلی گیرٹر لندن اتھارٹی کے بجٹ کی منظوری میں بھی کردار ادا کرتی ہے۔ میئر کی پالیسیوں کو لندن اسمبلی مسترد بھی کر سکتی ہے اور مجوزہ بجٹ میں ترمیم کا بھی اختیار رکھتی ہے لیکن اس کے لیے اس کے دو تہائی ارکان کی منظوری درکار ہوتی ہے۔صادق خان کو جمعرات کو ہونے والے الیکشن میں 57 فیصد سے زائد ووٹ حاصل ہوئے ۔ لیبر پارٹی سے تعلق رکھنے والے صادق خان لندن کے پہلے مسلمان میئر ہوں گے۔ پیشے کے اعتبار سے وہ ایک وکیل ہیں۔ انہوں نے قانون کی ڈگری نارتھ لندن یونیورسٹی سے حاصل کی تھی۔ سابق برطانوی وزیر اعظم گورڈن براؤن کے دور میں وہ وزیر بھی رہ چکے ہیں۔ انہوں نے میئر کے الیکشن میں قدامت پسند امیدوار زَیک گولڈ اسمتھ کو شکست دی۔ اْن کے والد 1960 کی دہائی میں پاکستان سے ہجرت کر کے برطانیہ میں آباد ہوئے تھے۔