لاہور (این این آئی )پاکستان تحریک انصاف کے مرکزی رہنما عبدالعلیم خان نے کہا ہے کہ کشکو ل توڑنے کا دعوی کرنے والوں نے صرف گذشتہ 9مہینوں میں عالمی مالیاتی اداروں سے6.9ارب ڈالر کا غیر ملکی قرضہ حاصل کیا جس سے پاکستان کا مجموعی قرضہ1869ٹریلین روپے تک جا پہنچا ہے ، آج پاکستانی قوم کا ایک ایک بال قرضوں میں جکڑا جا چکا ہے۔ عبدالعلیم خان نے پی ٹی آئی ٹریڈرز ونگ کے رہنماؤں سے گفتگو کرتے ہوئے کہا کہ تجربہ کارٹیم پر غرور کرنے والی نواز لیگ کے خود انحصاری کے دعوے بھی کھوکھلے ثابت ہوئے ہیں۔ وزیر خزانہ مالیاتی امور پر پاکستانی قوم کو اندھیرے میں رکھے ہوئے ہیں وہ اصل حقائق میڈیا سے بھی چھپانے کی کوشش کرتے ہیں جبکہ ان قرضوں کے علاوہ مختلف منصوبوں کے لیے چین اور ترکی کے ساتھ ہونے والے یکطرفہ معاہدوں کو بھی منظر عام پر نہیں لایا جا رہا جس کی ایک مثال اورنج لائن ٹرین کا ہونے والا معاہدہ ہائیکورٹ میں پیش کرنے سے انکار کی صورت میں سامنے آیا ۔عبدالعلیم خان نے کہا کہ آئی ایم ایف سے چھٹکارا حاصل کرنے کے دعوے بھی دھرے کے دھرے رہ گئے ہیں اور وفاقی حکومت کے اکنامک آفئیر زڈویژن نے دبئی میں آئی ایم ایف سے 500ملین ڈالر کے مزید قرضے کیلئے مذاکرات کیے ہیں ۔انہوں نے کہا کہ موجودہ حکومت نے قرضوں سے نجات دلانے کی بجائے پاکستان پر عالمی قرضوں کا نیا بوجھ لاد دیا ہے جس پر موجودہ حکمرانوں کا نام گینیز بک آف ورلڈ ریکارڈ میں آنا چاہیے ۔عبدالعلیم خان نے پی ٹی آئی ٹریڈرز ونگ کی طرف سے یکم مئی کے جلسے میں بھرپور شرکت کو سراہا اور انہیں اپنے ہر ممکن کا تعاون کا یقین دلایا انجمن تاجران لاہور کے صدر حاجی طاہر فیروز اور جنرل سیکرٹری میاں نوید نے کامیاب جلسے پر عبدالعلیم خان کو مبارکباد دی اور آئندہ بھی عمران خان کیلئے بھرپور تعاون کا یقین دلایا ۔