لاہور (نیوزڈیسک) پاکستان کرکٹ بورڈ کے گورننگ بورڈ کا اہم اجلا س آج ( منگل ) لاہور میں ہو گا جس میں قومی کرکٹ ٹیم کے ہیڈ کوچ کے نام کا اعلان بھی متوقع ہے ۔تفصیلات کے مطابق پاکستان کرکٹ بورڈ کے گورننگ بورڈ کا اہم اجلا س آج ( منگل ) نیشنل کرکٹ اکیڈمی قذافی سٹیڈیم لاہور میں چیئرمین پی سی بی شہر یار خان کی زیر صدارت منعقد ہو گا ۔جس میں قومی کرکٹ ٹیم کے چیف سلیکٹر انضمام الحق کی تقرری کے بارے میں گورننگ بورڈ کے رکن و چیئرمین واپڈا ظفر محمود کے اعتراضات زیر بحث آئیں گے۔اجلاس میں پاکستان سپر لیگ کے اکاؤنٹس ،پاکستان سپر لیگ میں چھٹی ٹیم ( ،مجوزہ نام کشمیر )کے اضافہ سمیت دیگر امور زیر بحث آئیں گے۔ذرائع کے مطابق پی سی بی حکام اجلاس میں قومی ٹیم کے نئے ہیڈ کوچ کے لئے درخواستیں دینے والے ملکی اور غیر ملکی کوچز کے نام پیش کریں گے اور اراکین کو نئے کوچ کی تعیناتی کے بارے میں اعتماد میں لیا جائیگا جس کے بعد نئے ہیڈ کوچ کے نام کا اعلان بھی متوقع ہے ۔