اسلام آباد(نیوزڈیسک) پیمرا کونسل آف کمپلینٹس خیبر پختونخوا ہ نے شکیل چندر کی زیرِصدارت پیمرا ریجنل آفس پشاور میں مورخہ 26اپریل2016 ؁ء کو منعقدہ اپنے 65ویں اجلاس میں عامر آفاق، ڈائریکٹر جنرل صوبائی ڈیزاسٹر مینجمنٹ اتھارٹی (PDMA) کیخلاف کردار کشی کرنے پر ڈان ٹی وی کو انتباہ جاری کرنے کی سفارش کی ہے۔کونسل نے محکمہ صحت خیبرپختونخواہ کی جانب سے دائرکردہ شکایت میں یوسف جان (رپورٹرAVTخیبرٹی وی) کا غیر قانونی طور پر مردان میڈیکل کمپلیکس کے گائنی لیبر روم میں داخل ہونے کے معاملے کو پروگرام کی ریکارڈنگ دیکھنے کے بعد پیمرا قوانین کی خلاف ورزی نہ ہونے کی وجہ سے نمٹا دیا۔ اجلاس میں دیگر کونسل ممبران بشمول عبدالستار خان، سید حماد حسین شاہ، محترمہ فرح خان،محترمہ فرح سلطان اشرف،محمد ارشاد اور راحت علی (ریجنل جنرل منیجر/سیکرٹری کونسل) بھی موجود تھے۔