لاہور(نیوز ڈیسک) لاہور ہائیکورٹ میں آئی جی پولیس پنجاب کیخلاف توہین عدالت کی ایک اور درخواست دائر کر دی گئی جسکے بعد آئی جی کیخلاف توہین عدالت کی مجموعی درخواستوں کی تعداد 103تک پہنچ گئی ۔ مقامی شہری محمد اشرف کی طرف سے آئی جی پنجاب مشتاق احمد سکھیرا کیخلاف دائر توہین عدالت کی درخواست میں موقف اختیار کیا گیا کہ سابق ایس ایچ او محمد اسلم نے اسکے گھر سے نقدی اور اسلحہ چوری کیا ۔آئی جی پنجاب کو اس بابت مقدمہ درج کرنے کی درخواست دی تھی تاہم کو ئی شنوائی نہیں ہوئی ۔درخواست گزار نے اس سلسلہ میں عدالت عالیہ سے رجوع کیا تھا جس نے آئی جی پنجاب کو درخواست گزار کو سن کر 6ہفتوں میں فیصلہ کرنے کی ہدایت کی تھی۔ درخواست گزار نے موقف اپنایا کہ عدالتی احکامات کے باوجود ابھی تک محمد اسلم کیخلاف کوئی فیصلہ نہیں کیا گیا جو توہین عدالت ہے ۔فاضل عدالت سے استدعا ہے کہ آئی جی پنجاب کیخلاف توہین عدالت کی کارروائی عمل میں لائی جائے ۔