لاہور ( نیوزڈیسک) درجہ حرارت میں اضافے ہونے کے بعد بجلی کی طلب بڑھنے سے لوڈ شیڈنگ کے دورانیے میں اضافہ ہو گیا ،لیسکو سمیت مختلف ڈسٹری بیوشن کمپنیوں نے مرمت کے نام پر گھنٹوں بجلی بند رکھنا معمول بنا لیا ، پانی کا بحران بھی شدید ہو گیا جسکے خلاف مختلف مقامات پراحتجاجی مظاہرے بھی کئے گئے ۔ذرائع کے مطابق موسم کی شدت میں اضافہ ہوتے ہی بجلی کی طلب میں اضافہ ریکارڈ کیا گیا ہے تاہم اس کے مقابلے میں پیداوار میں اضافہ نہیں ہو سکا جسکی وجہ سے مختلف شہری علاقوں میں 9سے 11جبکہ دیہی علاقوں میں 13سے 15گھنٹے کی لوڈ شیڈنگ کا سلسلہ شروع ہو گیا ہے ۔ ذرائع کے مطابق گزشتہ روز لیسکو سمیت دیگر ڈسٹری بیوشن کمپنیوں نے مرمت کے نام پر غیر اعلانیہ طور پر گھنٹوں بجلی کی بندش کی جس سے شہریوں کو شدید مشکلات درپیش رہیں۔دوسری طرف لاہور سمیت دیگر علاقوں میں پانی کا بحران بھی شدید ہو گیا ہے ۔ میٹرو کے روٹ پر تعمیراتی کاموں کی وجہ سے پانی بند رکھا جارہا ہے جبکہ لوڈ شیڈنگ کیو جہ سے بھی ٹیوب ویل نہ چلنے کی وجہ سے عوام پینے کے پانی کی بوند بوند کو ترس گئے ہیں۔ گزشتہ روز محمد نگر کے رہائشیوں نے کئی روز سے پانی کی بندش کے خلاف خالی برتن اٹھا کر احتجاجی مظاہرہ کیا اور واساکے خلاف شدید نعرے بازی کی گئی ۔دیگر مقامات پر بھی پانی کی بندش کے خلاف احتجاجی مظاہرے کئے گئے ۔