لاہور ( نیوزڈیسک) صوبائی وزیر قانون وپارلیمانی امور رانا ثناءاللہ نے کہا کہ تمام عسکری اور سول قیادت دہشتگردی کےخلاف ایک پیج پر ہے ، پنجاب میں اگر کسی کو بھی دہشتگردوں کے تربیتی مراکز کا علم ہے تو ہمیں بتائے اگر اتنی ہمت نہیں ہے تو ہمارے کان میں ہی بتادے ہم وہاں بھرپور کارروائی کریں گے ،رمضان شوکر مل سے ”را “کے ایجنٹوں کا پکڑے جانے والا معاملہ انتہائی بے بنیاد اور غلط قسم کی بات پھیلانے کی کوشش ہے ،ابھی تک کسی بھی ایجنسی نے اس کی رپورٹ فائل نہیں کی۔ پنجاب اسمبلی کے احاطے میں میڈیا سے گفتگو کر تے ہوئے رانا ثنا اللہ خان نے کہا کہ پنجاب میں اب کوئی نوگو ایریا نہیں۔ دہشتگردی کے خاتمے کے حوالے سے کارروائیوں میں انٹیلی جنس معلومات کی بنیاد پر آپریشنز کے ذریعے ہی کامیابیاں حاصل ہو رہی ہیں۔ رانا ثناءاللہ نے کہا کہ رمضان شوگر مل سے ”را “کے ایجنٹوں کا پکڑے جانے والا معاملہ انتہائی بے بنیاد ،ابھی تک کسی بھی ایجنسی نے اس کی رپورٹ فائل نہیں کی اور نہ ہی رمضان شوگر مل کے حوالے سے میرے پاس کو ئی اطلاع ہے ۔جو بھی اس طرح کے اقدامات میں ملوث پایا جائے گااس کے خلاف سخت سے سخت کارروائی کی جا ئے گی،ایسے لو گوں کو معافی نہیں دی جائے گی۔