لاہور (نیوز ڈیسک)صوبائی وزیر قانون پنجاب رانا ثناء اللہ نے کہا ہے کہ دہشت گردوں اور انکے سہولت کاروں کے خلاف بھی آپریشن تیز کر دیا گیا ہے،آپریشن ضرب عضب میں اچھے اور برے دہشتگردوں کا تصور ختم کر دیا ہے،بار بار کہہ چکا ہوں کہ پنجاب میں دہشتگردوں کی پناہ گاہیں ہیں تو نشاندہی کریں ہم کارروائی کریں گے،بھارتی جاسوس کے معاملے پردفتر خارجہ کام کررہا ہے ۔ان خیالات کا اظہار انہوں نے بدھ کے روز پنجاب اسمبلی کے باہر میڈیا سے گفتگو کرتے ہوئے کیا۔وزیر قانون پنجاب کا کہنا تھا کہ منفی گفتگو کرنا بہت افسوس ناک ہے،ہمارے پاس گلشن اقبال پارک میں ہونے والے دھماکے سے متعلق کوئی اطلاع نہیں بلکہ مون مارکیٹ پر حملے کی طلاع تھی۔انہوں نے کہا کہ سخت سیکیورٹی والے علاقوں میں بھی دہشتگردی ہو جاتی ہے،پنجا ب میں نیشنل ایکشن پلان کے تمام نکات پر عمل درآمد ہو رہا ہے۔انہوں نے مزید کہا کہ جے آئی ٹی گلشن اقبال پارک دھماکے کی تحقیقات کر رہی ہے۔