نئی دہلی (نیوز ڈیسک) سابق کرکٹر اور پاکستان تحریک انصاف کے چیئرمین عمران خان کی دعوت پر نئی دہلی کے وزیر اعلی اروند کیجریوا ل پاکستان کے دورہ پر جائیں گے۔بھارتی ٹی وی کے مطابق پاکستان تحریک انصاف کے چیئرمین عمران خان نے دورہ بھارت کے دوران متعدد رہنماو ¿ں اور سول سوسائٹی کے افراد سے ملاقاتیں کیں۔ دارالحکومت نئی دہلی کے وزیراعلی اروند کیجریوال سے ان کی رہائش گاہ پر ملاقات کے دوران عمران خان نے انہیں پاکستان اور بالخصوص صوبہ خیبر پختونخوا کا دورہ کرنے کی دعوت دی، جہاں پی ٹی آئی کی حکومت ہے۔ کیجریوال نے ان کی دعوت قبول کرلی ہے۔عمران خان اور کیجریوال نے بھارت اور پاکستان کے درمیان موجودہ تعلقات کی صورت حال پر بات چیت کی اور اپنے اپنے تجربات سے ایک دوسرے کو آگاہ کیا۔ذرائع کے مطابق ملاقات کے دوران عمران خان نے اروند کیجریوال سے بدعنوانی پر قابو پانے کے حوالے سے عام آدمی پارٹی حکومت کے طریقہ کار کے بارے میں بھی کئی باتیں معلوم کیں اور کیجریوال نے انہیں بتایا کہ وہ بدعنوانی کے معاملے میں کسی طرح کا سمجھوتہ نہیں کرتے مثلاً جب ان کے ایک وزیر پر الزام لگاتو نہ صرف اس وزیر کو برطرف کردیا گیا بلکہ اس کی انکوائری بھارت کے اعلی تفتیشی ادارے سی بی آئی کو سونپ دی۔ اسی طرح ایک چیف سکریٹری کے خلاف بھی تفتیش کا کام سی بی آئی کو سونپا گیا ہے۔