لاہور (نیوز ڈیسک) لاہور ہائی کورٹ نے رکن قومی اسمبلی جمشید دستی کے خلاف درخواست باقاعدہ سماعت کے لئے منظور کر لی۔ گزشتہ روز لاہور ہائی کورٹ کے جسٹس فرخ عرفان خان نے فاروق احمد نامی شہری کی جانب سے دائر درخواست کی سماعت کی۔درخواست گزار کی جانب سے موقف اختیار کیا گیا تھا کہ جمشید دستی نے جعلی ڈگری پر 2008ءکے عام انتخابات میں حصہ لیا جس پر عدالت عظمیٰ اس کے خلاف فیصلہ بھی دے چکی ہے ۔عدالتی فیصلے کے بعد جمشید دستی آئین کے آرٹیکل 62، 63پر پورا نہیں اترتے لہٰذا عدالت انہیں نااہل قرار دے۔ فاضل عدالت نے درخواست باقاعدہ سماعت کے لیے منظور کرتے ہوئے جمشید دستی کو نوٹس جاری کرتے ہوئے 26اپریل تک جواب طلب کر لیا۔