لاہور (نیوز ڈیسک) پنجاب اسمبلی میں قائد حزب اختلاف میاں محمودالرشید نے قومی کرکٹ ٹیم کی ناقص کارکردگی پر قرارداد اور صاف پانی کے منصوبوں میں مالی بے ضابطگیوں پر تحریک التوائے کار پنجاب اسمبلی سیکرٹریٹ میں جمع کرادی۔ میاں محمودالرشید کی جانب سے جمع کرائی جانیوالی قرارداد میں مطالبہ کیا گیا ہے کہ پاکستان کرکٹ بورڈ کی میرٹ پرتشکیل نو کی جائے اور حکومت من پسند افراد جو بورڈ سے لاکھوں روپے تنخواہیں وصول کرتے ہیں اور عملی کارکردگی صفر ہے انکو فی الفور عہدوں سے ہٹایا جائے، انہوں نے یہ بھی مطالبہ کیا کہ ماضی میں جن نامور کھلاڑیوں نے خدمات سرانجام دیں انکی مشاورت سے ایسا نظام وضع کیا جائے جو پاکستان کرکٹ ٹیم کے گرتے ہوئے معیار کو بہتر بنانے میں مددگار ثابت ہوسکے۔ میاں محمودالرشید نے گزشتہ روز پنجاب اسمبلی میںتحریک التوائے کار بھی جمع کرائی جس میں انکا کہنا تھا کہ صاف پانی کے منصوبوں میں مالی بے ضابطگیاں ہوئیں اور 40کروڑ کی خطیر رقم خرچ کرنے کے باوجود لاہور میں پینے کے پانی کی پائپ لائنوں میں سیوریج کے پانی کی آمیزش پائی جاتی ہے جو قابل تشویش ہے۔ انکا کہنا تھا کہ عوام کو میٹرو ٹرین اور بس سے زیادہ صاف پانی کی ضرورت ہے لیکن حکومت انتہائی بنیادی مسائل سے غافل ہے۔ انہوں نے مطالبہ کیا کہ تحریک التوائے کار کو باضابطہ قرارد دیکر اس پر ایوان میں بحث کرائی جائے اور پنجاب بھر میں ہنگامی طور پرصاف پانی کے منصوبے شروع کئے جائیں۔