اسلام آباد(نیوز ڈیسک)وفاقی دارلحکومت اسلام آباد میں موبائل فون سروس بند کردی گئی ہے،جو کہ دوپہر 3بجےتک بند رہے گی۔ موبائل فون سروس یوم پاکستان پریڈ کی تیاریوںاور ریہرسل کے باعث بند کی گئی ہے۔جو آج پریڈ گرائونڈ اسلام آباد میں منعقد ہوگی۔ 23مارچ یوم پاکستان کی پریڈ کو پاکستان کی تاریخ میں ایک کلیدی حیثیت حاصل ہے۔ عوام کی سہولت اور سکیورٹی کے پیش نظر آج سے 23 مارچ تک ٹریفک کے خصوصی انتظامات کئے گئے ہیں۔ ذرائع ابلاغ کے ذریعے جنرل پبلک ٹریفک پلان سے بار بار آگاہی کی جارہی ہے۔ آئی ایس پی آر کی جانب سے جاری کئے گئے ٹریفک پلان کے مطابق 21 مارچ سے 23 مارچ تک فیض آباد سے راول ڈیم چوک اور زیرپوائنٹ انٹرچینج سے صبح 6 بجے سہ پہر تین بجے تمام گاڑیوں کا داخلہ ممنوع ہوگا۔22 مارچ کی رات بارہ بجے سے 23 مارچ کی سہ پہر تین بجے تک گاڑیوں کا داخلہ بند رہے گا۔ جڑواں شہروں کی ضلعی انتظامیہ نے21مارچ کو فل ڈریس ریہرسل اور 23مارچ یوم پاکستان کے موقع پر شکر پڑیاں میں مسلح افواج کی پریڈ کے حوالے سے سکیورٹی کے پیش نظر شہریوں کی سہولت اورٹریفک کو رواں دواں رکھنے کے لیئے جامع اورمنظم ٹریفک پلان جاری کر دیا۔ اسلام آباد میں 21اور 23 مارچ کو صبح 6 سے دوپہر تین بجے تک تمام ٹریفک کا داخلہ راول ڈیم سے فیض آباد فلائی اوور زیرو پوائنٹ تک بند ہوگا‘ 20مارچ رات 12 بجے سے لے کر 21مارچ دن ایک بجے اور 22مارچ رات بارہ بجے سے لے کر 23مارچ دن تین بجے تک اسلام آباد اور راولپنڈی میں تمام ہیوی ٹریفک کا داخلہ بند رہے گا۔