کراچی (نیوزڈیسک) کراچی کے علاقے کورنگی کراسنگ میں رینجرز چوکی پر نامعلوم افراد نے دستی بم سے حملہ کیا جس کے نتیجے میں 2 اہلکار شدید زخمی ہوگئے۔تفصیلات کے مطابق کراچی کے علاقے کورنگی کراسنگ میں رینجرز کی چوکی پر نامعلوم افراد کی جانب سے کریکرپھینکا گیا جب اہلکار چوکی کے اندر موجود تھے، دستی بم پھٹنے کے نتیجے میں 2 اہلکار شدید زخمی ہوگئے جبکہ چوکی کی دیواریں منہدم ہوگئیں۔پولیس کے مطابق زخمی ہونے والے اہلکاروں میں حوالدار منظور اور سپاہی کلیم اللہ شامل ہیں جنہیں فوری طور پر انڈس اسپتال منتقل کردیا گیا ہے۔ واقعے کے بعد پولیس اور رینجرز کی بھاری نفری جائے وقوعہ پر پہنچ گئی اور علاقے کو گھیرے میں لے کر سرچ آپریشن شروع کردیا گیا جب کہ جائے وقوعہ کے قریب سے ایک مشکوک شخص کو بھی حراست میں لے لیا گیا ہے۔دھماکے سے ایک موٹرسائیکل کو بھی نقصان پہنچا ۔واقعہ کے بعد علاقے میں سکیورٹی ہائی الرٹ کردی گئی ہے جبکہ کورنگی کراسنگ کو ٹریفک کی آمد و رفت کے لیے بند کردیا گیا ہے ۔ایس پی کورنگی کا کہنا ہے کہ واقعہ کی مزید تحقیقات کی جارہی ہے ۔واضح رہے کہ چند روز قبل عیسی نگری اور موتی محل میں بھی نامعلوم ملزمان نے رینجرز کی چوکیوں پر دستی بم پھینکے تھے تاہم حملوں میں کوئی جانی نقصان نہیں ہوا تھا۔