کامونکے (نیوزڈیسک) بہن کی شادی والے دن بھائی موت کی وادی میں اتر گیا، باراتیوں کو جنازہ میں بھی شرکت کرنا پڑی۔بتایا گیا ہے کہ محلہ شریف پورہ کے رہائشی محنت کش ملک عنایت علی کی بیٹی کی گزشتہ روز شادی تھی اور اس سلسلے میں بارات فیصل آباد سے آئی،باراتیوں کے کھانے کیلئے انتظام کیا جا چکا تھا کہ سلاد کیلئے سامان کم پڑ گیا جس پر عنایت کا بارہ سالہ بیٹا شاہ زیب اپنے دیگر رشتہ داروں کے ہمراہ سلاد کیلئے سامان لینے چلا گیا کہ سبز منڈی کے سامنے جی ٹی روڈ پر سڑک عبور کرتے ہوئے وہاں سے گزرنے والے بجری سے بھرے ٹرک نے اسے کچل ڈالا حادثہ میں ٹرک کا پہیہ متوفی کے چہرے سے گزر گیا جس سے چہرہ بری طرح مسخ ہوگیا حادثے کی اطلاع ملتے ہی خوشیوں بھرے گھر میں کہرام مچ گیا متوفی کی نعش جب گھر پہنچی تو اس کی بہن کی بارات بھی آگئی جس پر باراتیوں کی خوشی غم میں بدل گئی اور ہر طرف آہ بکا شروع ہوگئی جس سے موقع پر موجود ہر شخص کی آنکھ اشکبار ہوگئی متوفی کے گھر والے اور بارات میں آئے باراتی دھاڑیں مار مار کر رونے لگے بعدازاں متوفی کی نماز جنازہ ادا کی گئی جس میں اہلیان علاقہ اور باراتیوں نے شرکت کی اور متوفی کو سینکڑوں سوگواروں کی موجودگی میں آبائی قبرستان میں سپرد خاک کردیا گیا،متوفی کے والد عنایت علی نے صحافیوں کو بتایا کہ وہ اللہ کی رضا پر راضی ہے اور اس نے ٹرک ڈرائیور کو معاف کردیا ہے اور اس نے کہاکہ شادی کیلئے پکایا گیا کھانا براتیوں کو ضرور کھلایا جائے گا تاہم وہ بیٹی کی رخصتی دو،تین دن کے بعد کرے گا اس نے بتایا کہ اس کا چائے کا کھوکھا ہے جس سے وہ اپنے اہلخانہ کا پیٹ پالتا ہے۔