اسلام آباد(این این آئی)قومی اسمبلی میں پیپلز پارٹی نے قومی کرکٹ ٹیم کی بدترین کارکردگی سے متعلق توجہ مبذول کرانے کا نوٹس واپس لے لیا۔ پیر کو اجلاس کے ایجنڈے پر پیپلز پارٹی کے میر اعجاز حسین جکھرانی ، عمران ظفر لغاری، نعمان اسلام شیخ ، میر شبیر علی بجارانی اور شازیہ مری کا قومی کرکٹ ٹیم کی بدترین کارکردگی کو ایوان میں زیر بحث لانے کا ایک توجہ مبذول کرانے کا نوٹس موجود تھا مگر ڈپٹی سپیکر مرتضیٰ جاوید عباسی نے ایوان کو آگاہ کیا کہ ورلڈ ٹی ٹونٹی کپ جاری ہے اس معاملے پر ایوان میں بحث سے کھلاڑیوں کا مورال کم ہوگا اسی وجہ ارکان نے مذکورہ توجہ مبذول کرانے کا نوٹس واپس لے لیا ہے اس پر ایم کیو ایم کے اقبال محمد علی خان نے کہا کہ پاکستان کرکٹ بورڈ کی کورننگ بورڈ کے ارکان گزشتہ 20 سال سے وہی ہیں انہی کی وجہ سے کرکٹ کا برا حال ہے پاکستان سپر لیگ سے کچھ اچھے کرکٹر سامنے آئے ہیں سلیکشن کمیٹی نے پی ایس ایل سے پہلے ٹیم سلیکٹ کر لی پی ایس ایل کے بعد اس ٹیم میں پھر تبدیلی کی گئی سلیکشن کمیٹی میں اہل لوگوں کو شامل کیا جائے شاہد آفریدی کو بوم بوم کس نے بنایا ۔پی سی بی کے خلاف نیب انکوائری کر کے ورلڈ کپ کے بعد موجودہ کرکٹ بورڈ میں تبدیلیاں کی جائیں اور میرٹ کے خلاف کوئی بات نہ کی جائے پیپلز پارٹی کے نواب یوسف تالپور نے کہا کہ شاہد آفریدی کے بیان کو منفی انداز میں نہ لیا جائے قومی ٹیم ایک دشمن ملک گئی ہے، شاہد آفریدی نے یہ بیان وہاں کے عوام کی ہمدریاں لینے کیلئے دیا ہے اس پر ڈپٹی سپیکر نے کہا کہ پوری قوم کی دعائیں قومی ٹیم کے ساتھ ہیں ۔