لاہور(نیوز ڈیسک)وزیر اعلی پنجاب محمد شہباز شریف کی ہدایت پر لاہور جنرل ہسپتال میں صاف ستھرے، آلودگی سے پاک اور حفظان صحت کے مطابق ماحول کی فراہمی کے منصوبے کےلئے حکومت پنجاب نے پانچ کروڑ روپے کے فنڈز کی منظوری دےدی ۔ اس رقم سے ہسپتال کی اندرونی سڑکوں کی ازسرنوتعمیر و کشادگی کے علاوہ پارکنگ ایریا اور اطراف میں ٹف ٹائلز لگائی جائیں گی تا کہ گرد و غباراورآلودگی کا خاتمہ ہو سکے نیز ہسپتال کے مختلف حصوں میں گرین بیلٹس بھی ڈویلپ کئے جائیں گے۔یہ بات پرنسپل پی جی ایم آئی پروفیسر ڈاکٹر خالد محمود نے انتظامی اجلاس کی صدارت کرتے ہوئے بتائی- انہوںنے کہا کہ ہسپتال کی عمارت کو آسمانی بجلی سے محفوظ رکھنے کےلئے لائٹنگ اریسٹر کی تنصیب کے علاوہ آگ لگنے کے کسی بھی ناگہانی واقعہ سے بچنے کے لئے فائر فائٹنگ سسٹم نصب کیا جائے گا- پروفیسر خالد محمود نے کہا کہ منصوبے کے تحت ہسپتال کے مختلف مقامات پر 16 پبلک باتھ رومز بھی تعمیر کئے جائیں گے- ہسپتال میں گاڑیوں کا داخلی اور خارجی راستہ بھی علیحدہ کر دیا جائے گا تا کہ ہسپتال آنے والے مریضوں اور شہریوں کو کسی قسم کی دشواری کا سامنا نہ کرنے پڑے۔