اسلام آباد(نیوز ڈیسک) وزارت داخلہ ذرائع کے مطابق انیس سو ستاون اور انیس سو چونسٹھ میں بنائے گئے قواعد میں قومی پرچم کے تقدس اور احترام کو قانونی حیثیت دی گئی۔ پاکستانی پرچم کو کسی ادارے کے ٹریڈ مارک یا ڈیزائن کے طور پر استعمال نہیں کیا جا سکتا۔ قومی پرچم کو تیئس مارچ، چودہ اگست اور پچیس دسمبر یا گزیٹڈ قومی دن پر ہی پرائیویٹ عمارتوں پر لہرایا جا سکتا ہے۔ صدر، وزیر اعظم، گورنرز، وزرا، چیئرمین سینیٹ، سپیکر اور چیف الیکشن کمشنر کی رہائش گاہوں اور گاڑیوں پر عام دنوں میں جھنڈا لہرایا جا سکتا ہے۔ قواعد کے تحت عام دنوں میں صرف پارلیمنٹ، صوبائی اسمبلیوں، عدالتوں سمیت سرکاری عمارتوں پر ہی پرچم لہرایا جا سکتا ہے۔