لاہور(نیوز ڈیسک)انسداد دہشتگردی لاہور کی خصوصی عدالت نے فیس بک اور انٹرنیٹ کے ذریعے دو سو سے زائد خواتین ڈاکٹروں کو بلیک میل کرنے کے مقدمے کی سماعت 12مارچ تک ملتوی کرتے ہوئے استغاثہ کے مزیدگواہوں کو شہادتوں کے لئے طلب کر لیا۔ گزشتہ روز انسداد دہشتگردی لاہور کی خصوصی عدالت کے جج خواجہ ظفر اقبال نے کیس کی سماعت کی۔تھانہ گوالمنڈی پولیس نے ملزم عبدالوہاب علوی کو سخت سکیورٹی میں عدالت کے روبرو پیش کیا۔ملزم کی جانب سے عدالت کو آگاہ کیا کہ پولیس نے میڈیا کے دباﺅ پر اسکے خلاف درج مقدمے میں دہشتگردی کی دفعات عائد کر رکھی ہیں۔ینگ ڈاکٹرز ایسویسی ایشن کے سیکرٹری ڈاکٹر سلمان کاظمی نے عدالت کو بتایا کہ کہ ملزم عبدالواہاب علوی نے فیس بک اور انٹرنیٹ کے ذریعے خواتین ڈاکٹروں کو ہراساں کیا جس کے باعث درجنوں خواتین ڈاکٹرز پیشہ چھوڑنے پر مجبور ہو گئیں۔پولیس کے گواہ سب انسپکٹر اشرف بسرا نے اپنا بیان عدالت کے روبرو قلمبند کراتے ہوئے بتایا کہ ملزم کی نازیبا حرکات کی بناءپر کئی خواتین ڈاکٹرز کے رشتے ٹوٹ گئے جبکہ ملزم ڈاکٹر ز کو بلیک میل کر کے بھتہ بھی وصول کرتا رہا۔جس پر عدالت نے استغاثہ کے مزیدگواہوں کو12مارچ کو شہادتوں کے لئے طلب کر لیا۔