ڈھا کہ(نیوز ڈیسک)سری لنکن ٹی ٹوئنٹی کپتان اور مایہ ناز فاسٹ باؤلر لاستھ ملنگا نے آئندہ ماہ ورلڈ ٹی ٹوئنٹی کے بعد کرکٹ سے ریٹائرمنٹ کا عندیہ دیا ہے۔ایک عرصے سے انجری کا شکار ملنگا نے ایشیا کپ ٹی ٹوئنٹی میں متحدہ عرب امارات کے خلاف میچ میں 26 رنز کے عوض چار وکٹیں لے کر یادگار انداز میں کرکٹ میں واپسی کی لیکن ایسا محسوس ہوتا ہے کہ یہ کارکردگی بھی انہیں مطمئن نہ کر سکی۔ملنگا نے کہا کہ ان کی ریٹائرمنٹ کا وقت قریب آ گیا ہے اور وہ ٹی ٹوئنٹی سے بھی ریٹائرمنٹ پر غور کر سکتے ہیں۔جمعرات کو میچ کے بعد پریس کانفرنس سے خطاب کرتے ہوئے ایک سوال کے جواب میں فاسٹ باؤلر نے ورلڈ ٹی ٹوئنٹی کے بعد ریٹائرمنٹ کا عندیہ دیا۔اس سے قبل انہوں نے کہا تھا کہ وہ اب اپنے کیریئر میں ایک ایسے مقام پر ہیں جہاں وہ لمبے عرصے تک کرکٹ سے دور نہیں رہ سکتے۔ یاد رہے کہ ٹخنے کی انجری کے سبب ملنگا تین ماہ تک کرکٹ سے دور رہے تھے۔انہوں نے کہا تھا کہ میں قومی ٹیم کیلئے گزشتہ 12 سال سے کھیل رہا ہوں، میں 32 سال کا ہو چکا ہوں، میں سوچتا ہوں کہ اب اگر مجھے کوئی انجری ہوتی ہے تو میرے لیے آرام کی غرض سے وقفہ لینا مشکل ہو گا، اگر میں ایک سال یا اس سے زائد کا وقفہ لیتا ہوں تیو یہ میرے کیریئر کا اختتام ہو گا، مجھے نہیں لگتا کہ میں اس انجری سے مکمل طور پر صحتیاب ہونے میں کامیاب ہو سکوں گا لیکن میں پھر بھی اس پر قابو پانے کی کوشش کروں گا۔فاسٹ باؤلر نے کہا کہ میں اپنی کارکردگی سے خوش نہیں، میں گزشتہ تین ماہ کے دوران باؤلنگ نہیں کر سکا اور صرف دو سے نیٹ میں باؤلنگ کر رہا تھا، یقیناً نتائج بہت حوصلہ افزا ہیں لیکن میں محسوس کرتا ہوں کہ مجھے ٹیم کیلئے مزید کچھ کرنے کی ضرورت ہے۔یاد رہے کہ جمعرات کو ایشیا ٹی ٹوئنٹی میں متحدہ عرب امارات کے خلاف سری لنکا کی ٹیم 128 رنز بنانے کے باوجود کامیابی سے ہمکنار ہوئی جس کا سہرا لاستھ ملنا کے ہی سر جاتا ہے۔سری لنکن ٹیم ایونٹ میں اپنا اگلا میچ 28 فروری کو میزبان بنگلہ دیش کے خلاف کھیلے گی۔