ممبئی( نیوز ڈیسک)بولی ووڈ اداکارہ پریانکا چوپڑا آج کل بولی ووڈ میں کامیابیاں سمیٹنے کے ساتھ مغرب میں بھی کامیابی کے جھنڈے گاڑھ رہی ہیں۔اداکارہ آجکل اپنی پہلی امریکی ٹیلی ویڑن سیریز کوانٹکو کی شوٹنگ میں حصہ لینے کیلئے امریکہ کے دورے پر ہیں۔سابق حسینہ عالم کو حال ہی میں کوانٹکو میں شاندار اداکاری کا مظاہرہ کرنے پر پیپلز چوائس ایوارڈ سے نوازا گیا تھا۔گزشتہ میڈیا رپورٹس کے مطابق چند روز قبل اداکارہ کی جانب سے انٹرویو دیتے ہوئے اس بات کا اقرار کیا گیا تھا کہ وہ کسی کی محبت میں گرفتار ہیں تاہم انھوں نے اپنے ساتھی کانام ظاہر کرنے سے معذوری کا اظہار کیا تھا۔حال ہی میں اداکارہ نے میڈیا نمائندگان سے بات چیت کرتے ہوئے شادی اور شادی کے جوڑے کے متعلق پوچھے گئے سوال کے جواب میں کہا کہ وہ اتنی مرتبہ فلموں میں دلہن بن چکی ہیں کہ حقیقت میں دلہن بننا انکے لئے ہر گز آسان نہ ہو گا۔اداکارہ نے ہنستے ہوئے کہا کہ وہ اپنی شادی کے دن روایتی لباس کی بجائے ٹریک پینٹ اور ٹی شرٹ پہننا زیادہ پسند کریں گی