فیصل آباد (نیوز ڈیسک) وزیراعلیٰ پنجاب شہبا زشریف کی ہدایت پر مایہ ناز کرکٹر سعید اجمل کو فوری طور پر کرکٹ اکیڈمی کیلئے جھنگ روڈ فیصل آباد پر جگہ فراہم کردی گئی۔ اکیڈمی کا افتتاح 31 جنوری بروز اتوار کو ڈی سی او فیصل آباد کریں گے۔ اس سلسلہ میں ضلعی انتظامیہ اور کرکٹر سعید اجمل کے مابین ایم او یو پر دستخط ہوگئے ہیں۔آن لائن کے مطابق سعید اجمل کو تقریباً دو سال قبل زرعی یونیورسٹی فیصل آباد میں کرکٹ اکیڈمی کیلئے جگہ فراہم کی گئی تھی جس پر سعید اجمل نے کروڑوں روپے کی لاگت سے اس کرکٹ اکیڈمی کی تیاری کرائی جس میں غیر ملکی معیار کے مطابق کرکٹر کھیلنے کیلئے وکٹیں تیار کی گئیں ۔ زرعی یونیورسٹی کی کرکٹ اکیڈمی میں پاکستان کرکٹ ٹیم کے کپتان مصباح الحق اور کھلاڑی بھی پریکٹس میں حصہ لیتے رہے بعد ازاں یونیورسٹی کے وائس چانسلر ڈاکٹر اقرار احمد نے سکیورٹی کا بہانہ بنا کر اکیڈمی کو بند کردیا جس پر سعید اجمل اور کرکٹ کے شائقین نے وی سی کے خلاف احتجاج کیا جس پر وزیراعلیٰ پنجاب میاں شہباز شریف ‘ اور ممبر قومی اسمبلی حمزہ شہباز شریف نے کمشنر فیصل آباد کو اس معاملے کو حل کرانے کاحکم دیتے ہوئے رپورٹ طلب کی چنانچہ ڈویژن اور ضلعی انتظامیہ رپورٹ پر سعید اجمل کو فوری طو رپر چنار روڈ پر واقعہ فردوس کالونی میں دس کروڑ روپے کی لاگت سے نئے تعمیر ہونے والے شہباز شریف سپورٹس سٹیڈیم اینڈ پارک میں اکیڈمی بنانے کیلئے جگہ مہیا کردی گئی ہے سعید اجمل نے آن لائن کو بتایا کہ وہ انشاء الله اس اکیڈمی کو ملک کی بہترین اکیڈمی بنائیں گے جس میں ملک بھر کے کرکٹ کے کھلاڑی اور شائقین بھرپور حصہ لیں گےانہوں نے کہا کہ زرعی یونیورسٹی کرکٹ اکیڈمی کی بحالی کا سلسلہ جاری رکھیں گے اور انہیں امید ہے زرعی یونیورسٹی میں قائم کی جانے والی اکیڈمی جلد ہی واگزار ہوجائیگی اور دوبارہ ملک بھر کے کرکٹ کے کھلاڑی پریکٹس کریں گے۔