دبئی(نیوزڈیسک) نیوزی لینڈ سے شکست کے بعد پاکستانی تیم ٹی ٹوئنٹی رینکنگ میں ایک درجہ تنزلی کے بعد ساتویں نمبر پر آگئی جب کہ کوئی بھی پاکستانی بلے باز ٹاپ ٹن میں جگہ بنانے میں کامیاب نہ ہوسکا ۔انٹرنیشنل کرکٹ کونسل (آئی سی سی ) نے ٹی ٹوئنٹی کی نئی رینکنگ جاری کردی جس کے مطابق نیوزی لینڈ سے سیریز ہارنے کے بعد قومی ٹیم ایک درجہ تنزلی کے بعد چھٹی سے ساتویں پوزیشن پر پہنچ گئی ہے جب کہ نیوزی لینڈ کی کامیابی نے اسے 2 درجے ترقی کے ساتھ پانچویں پوزیشن پر پہنچا دیا ہے۔ نئی رینکنگ میں ویسٹ انڈیز بدستور پہلے ، آسٹریلیا دوسرے اور سری لنکا تیسرے نمبر پر براجمان ہیں جب کہ جنوبی افریقہ چھٹی پوزیشن سنبھالے ہوئے ہے تاہم بھارت پاکستان سے بھی ایک درجہ نیچے آٹھویں نمبر پر موجود ہے، افغانستان نویں اور بنگلہ دیش دسویں نمبر پر قابض ہیں۔ٹی ٹوئنٹی فارمیٹ میں کوئی بھی پاکستانی بلے باز ٹاپ ٹین میں موجود نہیں ہے۔ آئی سی سی کے مطابق بیٹسمینوں میں آسٹریلیا کے ایرون فنچ پہلے ، بھارت کے ویرات کوہلی دوسرے ، انگلینڈ کے ایلکس ہیلز تیسرے ، جنوبی افریقہ کے فاف ڈوپلیسس چوتھے ، نیوزی لینڈ کے مارٹن گپٹل پانچویں پر موجود ہیں جب کہ نیوزی لینڈ کے کپتان کین ولیمسن پانچ درجے ترقی پانے کے بعد پہلی بار چھٹے نمبر پر پہنچے ہیں، ویسٹ انڈیز کے مایہ ناز بلے باز کرس گیل ساتویں ، زمبابوے کے مساکیڈزا آٹھویں ، افغانستان کے محمد شہزاد نویں اور سری لنکا کے پریرا دسویں نمبر پر ہیں۔
بولنگ میں قومی ٹیم کے کپتان شاہد آفریدی ایک درجہ ترقی پا کر تیسرے نمبر پر آگئے ہیں جب کہ آل راؤنڈرز کی فہرست میں بنگلا دیش کے شکیب الحسن پہلے، شاہد آفریدی دوسرے ، آسٹریلیا کے شین واٹسن تیسرے ، پاکستان کے محمد حفیظ چوتھے ، سری لنکا کے میتھیوز پانچویں ، ویسٹ انڈیز کے سیمیولز چھٹے نمبر پر ہیں جب کہ جنوبی افریقہ کے ڈومنی ساتویں، بھارت کے یووراج سنگھ آٹھویں، ویسٹ انڈیز کے براوو نویں اور آسٹریلیا کے میکسویل دسویں نمبر پر موجود ہیں ۔