لاہور (نیوز ڈیسک) ملک میں پہلی بار فیصل آباد کے ایوب ریسرچ سنٹر میں بغیر بیج کے کینوں کاشت کرنے کا کامیاب تجربہ کیا گیا ہے جسکی قیمت عام کینوں کے مقابلے میں تو زیادہ ہے لیکن اب انہیں بیرون ممالک بھیجا جائے گا۔ایوب ریسریچ سنٹر ملک کا واحد تحقیقاتی ادارہ جہاں سائنسدانوں نے کمال کر دکھایا اور بغیر بیج کے کینوں کی کامیاب کاشت کا تجربہ کیا ۔بغیر بیج کے کینوں کی کامیاب کاشت کا تجربہ تو 2004ءمیں کیا گیا تھا مگر بارہ سال بعد محنت کا سمر ملا اور خواب کوپایاں تکمیل تک پہنچا ہی دیا گیا ۔ عام کینوں میں 6سے 8بیج ہوتے ہیں لیکن اس اپنی طرز کے منفرد کینوں میں تو ایک بھی بیج نہیں جس کا عملی مظاہرہ بھی دکھایا گیا۔ اب اس کینوں کو بیرون ممالک بھیج کر معیشت کو بہتر کیا جائے گا۔ابتدائی طور پر بغیر بیج کے کینوں کی کاشت سرگودھا ، ٹوبہ ٹیک سنگھ اور لیہ میں کی جا رہی ہے ، منفرد کینوں کو جاپان ، یورپ، فرانس اور کینیڈا میں درآمد کیا جائے گا جبکہ مانگ میں اضافے پر نئی کاشت میں تیزی لائی جائے گی ۔منفرد کینوں کا ذائقہ بھی عام کینوں کی نسبت زیادہ مٹھاس رکھتا ہے لیکن کینوں کی قمیت مارکیٹ میں آنے والے عام کینوں کی نسبت 5سے 7گنا زیادہ ہے ۔صنعتی شہر کے نام سے بیرون ممالک میں تو فیصل آباد لوہا منوا چکا ہے ایسے میں سائنس دانوں کی یہ کاوش بھی غیر ملکیوں کو مرکز نگاہ بنائی رکھے گی جبکہ منفرد کینوں کا نام ایری رکھا گیا ہے ۔