ممبئی (نیوز ڈیسک) بھارت میں ہونےوالے سالانہ سکرین ایوارڈ میں امیتابھ بچن، رنویر سنگھ اور دپیکا پڈوکون نےبہترین اداکار و اداکارہ کے ایوارڈجیت لئے۔ ممبئی میں سکرین ایوارڈ 2016 کی تقریب منعقد کی گئی جس میں بالی ووڈ کے نامور ستاروں سمیت ممتاز شخصیات نے بھی شرکت کی۔ تقریب میں بالی ووڈ کے میگا اسٹار امیتابھ بچن کو فلم ’ پیکو‘ اور نوجوان اداکار رنویر سنگھ کو فلم ’باجی راﺅ مستانی‘ میں عمدہ اداکاری پر بہترین اداکار کا ایوارڈ دیا گیا جبکہ اداکارہ دپیکا پڈوکون کو فلم ’پیکو‘ میں شاندار اداکاری پر بہترین اداکارہ کے ایوارڈ سے نوازا گیا۔ بالی ووڈ کے ناموراداکار رشی کپور کو لائف ٹائم اچیومنٹ ایوارڈ دیا گیا۔سکرین ایوارڈکی تقریب میں بالی ووڈ کنگ شاہ رخ خان کو ’پاپولر چوائس‘ کیٹیگری میں بہترین اداکار اور دپیکا پڈوکون کو بہترین اداکارہ کا ایوارڈ دیا گیا جبکہ شاہ رخ خان اور کاجول نے بالی ووڈ کی بہترین جوڑی کا ایوارڈ اپنے نام کیا۔