اسلام آباد: وفاقی پولیس کا نیا کارنامہ سامنے آ گیا ہے۔ تین سالہ بچے کیخلاف پلازے پر قبضہ کرنے کا مقدمہ تھانہ شالیمار میں درج کر لیا گیا۔ ننھا عثمان چچا کی گود میں دیگر ملزمان کے ہمراہ ضمانت قبل از گرفتاری کیلئے جوڈیشل مجسٹریٹ کے سامنے پیش ہو گیا۔ اسلام آباد پولیس نے سیکٹر ایف ٹین کے پلازے پر قبضے کے الزام میں تین سالہ عثمان کیخلاف تھانہ شالیمار میں مقدمہ درج کیا ہے۔ پولیس نے پہلے تو معاملہ دبانے کی کوشش کی تاہم ایف آئی آر کی کاپی سامنے آنے پر اسے غلطی قرار دیا ، ایف آئی اے میں واضح طور پر عثمان کو ملزم نامزد کیا گیا ہے اور الزام عائد کیا گیا ہے کہ پلازے کی بیسمنٹ میں موجود سامان بھی چوری کر لیا گیا ہے۔ ضمانت قبل از گرفتاری کیلئے ننھا ملزم ضلع کچہری میں راجہ آصف محمود ایڈیشنل سیشن جج کے سامنے پیش ہوا۔ عدالت نے درخواست قبل از گرفتاری پر ملزمان کے وکیل سے استفسار کیا کہ کیا کمسن بچے کو پولیس گرفتار کرنے کے لئے آئے گی ، کیا بچے کی ضمانت بنتی ہے۔ کمرہ عدالت میں موجود وکلا عدالت کی رہنمائی کریں۔ عدالت نے برہمی کا اظہار کرتے ہوئے کہا کہ اتنا چھوٹا بچہ جرم کا ارتکاب کیسے کر سکتا ہے ، اگر ایک ادارہ غلط کام کرتا ہے تو کیا عدالت بھی آنکھیں بند کرلے۔ عدالت نے کمسن بچے کا نام ایف آئی آر میں شامل کرنے پر ایس ایچ او تھانہ شالیمار ، تفتیشی افسر اور فریقین کو آئندہ سماعت پر طلب کر لیا۔ مقدمے میں نامزد دیگر ملزمان کی پچاس ہزار روپے کے مچلکوں کے عوض سات جنوری تک عبوری ضمانت منظور کر لی۔