اسلام آباد (نیوز ڈیسک)سعودی وزارت حج کے آن لائن ای نمبر سسٹم میں خرابی کے باعث دنیا بھر کا عمرہ ویزہ رک گیا ۔عمرہ زائرین کو ہوائی ٹکٹوں کی مد میں کروڑوں روپے کا نقصان سعودی سفارتخانے سے فی الفور اصلاح احوال کا مطالبہ۔تفصیلات کے مطابق دنیا بھر میں عمرہ زائرین کیلئے ویزوں کے اجراء کے آن لائن سعودی نظام میں تکنیکی خرابی کے باعث عمرہ ویزوں کے اجراءکا نظام پیر سے تعطل کا شکار ہے جس کی وجہ سے عمرہ زائرین کو ٹکٹوں کی مد میں کروڑوں روپے کا نقصان برداشت کرنا پڑ رہا ہے۔عمرہ کمپنی کے ذرائع نے بتایا کہ سعودی وزارت حج کی طرف سے پاکستان سمیت دنیا بھر میں رواں سال کیلئے عمرہ ویزوں کے اجراءکیلئے بنائے گئے آن لائن نظام میں تکنیکی خرابی کا سامنا کرنا پڑ رہا ہے۔ عمرہ ویزہ کی سعودی عرب سے منظوری آنے کے باوجود ای نمبر نکالنے کا سسٹم پچھلے دو روز سے خراب ہے جس کے باعث پاکستان سمیت دنیا بھر کے عمرہ زائرین شدید پریشانی کا شکار ہیں۔ اسلام آباد میں سعودی سفارتخانے کی جانب سے یہ عذر پیش کیا جارہا ہے کہ پوری دنیا کا عمرہ سسٹم خراب ہے جس میں درپیش تکنیکی خرابی کو دور کرنے کیلئے سعودی وزارت حج مصروف عمل ہے تاہم عمرہ زائرین نے اسلام آباد میں سعودی سفارتخانے سے درخواست کی ہے کہ انہوں نے کئی کئی ماہ پہلے سے عمرہ ٹکٹیں بک کروا کے عمرے پر جانے کا اپنا پروگرام فائنل کیا ہوا ہے تاہم ویزہ نہ لگنے کی وجہ سے انہیں عمرہ ٹکٹوں کی تبدیلی اور ری فنڈ کی مد میں شدید نقصان اور پریشانی کا سامنا کرنا پڑ رہا ہے۔ انہوں نے سعودی سفارتخانے سے درخواست کی کہ وہ اس معاملے کی سنگینی کے پیش نظر عمرہ سسٹم میں تکنیکی خرابی کو فی الفور دور کرے۔